छवाःयंकंया उद्घोषण तालिम क्वचाल

यल(नेपालभाषा टाइम्स)( यल महानगरपालिका १६ वडाय् न्ह्यानाच्वंगु उद्घोषण व व्यक्तित्व विकास तालिम क्वचाःगु दु । यल महानगरपालिका १६ वडा ज्याकूया बाल अधिकार समितिया ग्वसालय् छवाःयंकंया उगु तालिम जूगु खः ।

यल महानगरपालिका १६ वडाअध्यक्ष निर्मलरत्न शाक्यं तालिम कयादीपिं प्रशिक्षार्थीपिंत दसिपौ लःल्हानादीगु खः । थनया हःखाबहाःस्थित रत्नाकर महाविहारय् जूगु तालिम समापन ज्याझ्वलय् प्रशिक्षार्थीतय्त दसिपौ लःल्हानादिसें वडाअध्यक्ष शाक्यं तालिम सयेकेगु जक मखसे थम्हं सयेकागु ज्ञान, सीपयात व्यवहारय् नं लागू यायेत इनाप यानादिल ।

समापन ज्याझ्वलय् तालिमया संयोजक लिसें वडा सदस्य बबिता श्रेष्ठं तालिमय् मस्तय् सहभागितां थः तसकं उत्साहित जूगु खँ कनादिसें फुसर्दया इलय् मोबाइल स्वयाः ई सितिं छ्वयेगु पलेसा मस्तय्त थीथी कथंया अतिरिक्त क्रियाकलाप, रचनात्मक गतिविधि व अज्याःगु हे मेमेगु गतिविधि सहभागि याकेमाःगु खँय् बः बियादिल ।

रत्नाकर महाविहारया कर्ण वज्राचार्यं प्रशिक्षार्थीतय्त पत्रपत्रिका स्वयाः ततःसलं ब्वनेगु बानी यायेत इनाप यात धाःसा थुकिं आत्मविश्वास ब्वलनीगु नापं शुद्ध उच्चारण याये फइगु, न्हूगु खँ सीके फइ धयादिल ।

प्रशिक्षक सरिना वज्राचार्यं प्रशिक्षण बियादीगु तालिम समापन ज्याझ्वः प्रशिक्षार्थी लक्की महर्जनं न्ह्याकादीगु खः ।

सम्बन्धित बुखँ

LEAVE YOUR COMMENTS