ने. सं. ११४६ अनलाथ्व नवमी -

एमालेया रिटय् फाइल माग

येँ – नेकपा एमालेया अध्यक्ष केपी ओलीं निर्वाचन आयोग, सभामुख लगायतयात विपक्षी दयेकाः दायर याःगु रिटय् सक्कल फाइल झिके यायेत आदेश बिउगु दु । म्हिगः न्यायाधीशपिं दिपककुमार कार्की व डा. कुमार चुडालया मंकाः इजलासं निर्णयया सक्कल फाइल झिके यायेगु आदेश बिउगु खः ।

एमालेया अध्यक्ष केपी ओलीं पार्टीं कारबाही यायेधुंकूपिं केन्द्रीय दुजःतय्त सनाखत याकाः दल दर्ता याःगु धासें उकियात बदर यायेमाःगु माग यासें सर्वोच्चय् रिट तःगु खः । उकथं हे ओलीं पार्टीं कारवाही याःपिं झिंप्यम्ह सांसदयात सभामुख अग्निप्रसाद सापकोटां मान्यता मबिउगु धासें सभामुखया निर्णय नं बदर यायेत माग याःगु दु ।

अथे हे सर्वोच्च एमालें कारबाही याःपिं सांसदयात मान्यता मबीगु सभामुखया भदौ १३ गतेया निर्णय नं झिके यायेत आदेश बिउगु दु । सभामुख सापकोटां बिस्कं दल दर्ता जुइधुंकूगु धासें कारबाही यायेम्वाःगु निर्णय याःगु खः ।

उकथं हे ओलीं लुम्बनी प्रदेशसभाय् नं एमालेया निम्ह सांसदयात याःगु कारबाही सभामुख पूर्णबहादुर घर्तीं मान्यता मबिउगु कानुन अःखः ज्या जूगु धासें उकियात बदर यायेत माग यानातःगु दु । सर्वोच्च अदालतं लुम्बिनी प्रदेशसभाया सभामुखं भदौ ४ गते याःगु निर्णयया नं सक्कल प्रति हजि धाःगु दु ।

एमाले विभाजन जुयाः एकीकृत समाजवादी पार्टी दर्ता जुइधुंकाः ओलीं पार्टीं कारबाही यायेधुंकूपिं केन्द्रीय दुजः व सांसदपिंसं सनाखत यानाः दर्ता जूगु पार्टी हे अवैधानिक खः धासें रिट दायर याःगु खः ।

थुगु रिटयात कयाः वंगु २२ गते प्रधानन्यायाधीश चोलेन्द्र शम्शेर जबराया एकल इजलासं विपक्षीतय्के लिखित लिसः फ्वँसें भदौ २९ गते अन्तरिम आदेशया नितिं सहलह यायेत सःतेगु आदेश बिउगु खः । तर भदौ २९ गते दिपककुमार कार्की व मीरा खड्काया इजलासं स्वये मलाःगु खः ।

वयां लिपा म्हीग न्यायाधीश कार्की व चुडालया इजलासय् सुनवाइ जूगु खःसा सुनुवाइ क्वमचायेवं निरन्तर स्वयेगु झ्वलय् म्हिगः सुनुवाइ जूगु खः । म्हिगः अन्तरिम आदेशया बारे धाःसा गुगुं नं कथं सहलह मजू । सक्कल निर्णय वयेधुंकाः जक अन्तरिम आदेशया नितिं पेश जुइगु खँ धाःगु दु ।