नेपाःया समस्या थुइकाः चीनं प्रमयात लिपा जक सःतूगु धापू

येँ (नेपालभाषा टाइम्स)÷प्रधानमन्त्री पुष्पकमल दाहालं चीनय् जूगु बोवाओ फोरमय् वने मखु धकाः नेपालं निर्णय मयानागु खँ धयादीगु दु । म्हिगः राष्ट्रियसभाय् सरकारया नीति तथा कार्यक्रमयात कयाः ब्वलंगु न्ह्यसःया लिसः बिसें वय्कलं उगु खँ धयादीगु खः ।

वय्कलं चीनय् जूगु बोवाओ फोरमय् ब्वनापौ वःगु खँ स्वीकार यासें तर नेपालं सरकारं वनेमखु धकाः निर्णय मयानागु स्पष्टीकरण बियादीगु खः । सम्बोधनया झ्वलय् प्रधानमन्त्री दाहालं धयादिल, ‘थन राष्ट्रपति, उपराष्ट्रपति चुनावया दबाव, गठबन्धन दयेकेगु व क्वःथलेगु प्रक्रिया खनेधुंकाः सरकारयात मछिनाच्वंगु खनेधुंकाः चिनियाँ राजदूतं हे छि बोवाओ फोरमय् वनेगु सम्भावना जिमिसं खनाच्वनागु मदु, छुं लिपा जक चीन भ्रमण यायेगु खः ला धकाः न्यनेधुंकाः जिं वय्कःयात जिमिगु मर्का थुइकादिल, सुभाय् धयागु खः ।’

प्रधानमन्त्री दाहालं न्हापा भारत भ्रमण यायेगु वा चीन धइगु गुगुं संवैधानिक व कानुनी बाध्यता मदु धासें ई व परिस्थिति कथं सरकारं निर्णय याइगु खँ नं धयादीगु दु । थः न्हापांखुसी प्रधानमन्त्री जूगु इलय् न्हापां चीन भ्रमण यानागु धासें भूगोल, अर्थतन्त्र, खुला सिमाना, जन सम्बन्धया महत्व आदि कारणं भारतलिसे विशिष्ट सम्बन्ध दुगु खँ नं धयादिल ।