सर्वोच्चं पना बिल थःगु हे गाडीं ट्रायलया व्यवस्था

येँ -सवारी साधनया लाइसेन्स कायेत बी माःगु प्रयोगात्मक परीक्षाय् थःगु हे सवारी साधन छ्यले दइ धकाः सरकारं यानातःगु निर्णय सर्वोच्च अदालतं पना बिउगु खँ भौतिक पूर्वाधार तथा यातायात मन्त्रालयं धाःगु दु । म्हिगः संसदया विकास तथा प्रविधि समितिया बैठकय् मन्त्रालयया सचिव रविन्द्रनाथ श्रेष्ठं थ्व खँ कँसें परीक्षाय् थःगु हे सवारी साधन छ्यले दइगु व्यवस्था मन्त्रालयं यानागु खःसां सर्वोच्च अदालतया आदेशं यानाः कार्यान्वयन याये मफुगु जानकारी बियादीगु खः ।

सवारी साधन चले यानाः बीमाःगु प्रयोगात्मक परीक्षा यातायात व्यवस्था विभागं ठेक्काय् बियातःगु दु । सर्वोच्च अदालतं नं ठेक्का मार्फत हे थ्व ज्या याका ति धकाः आदेश बिउगुलिं थःगु हे सवारी साधन छ्यलाः परीक्षा बी दइगु व्यवस्था लागू याये मफुगु खँ नं सचिव श्रेष्ठं कनादिल । थौंकन्हय् ट्रायल पास याःगु न्हि कुन्हु लाइसेन्स बी फइगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS