ने. सं. ११४६ बछलागा पञ्चमी -

मौसम बांमलाःसा उडान याये मदु

येँ – नेपाल नागरिक उड्डयन प्राधिकरण (क्यानं) मौसम सफा मजुइकं आन्तरिक उडानया नितिं अनुमति मबीगु जूगु दु । प्राधिकरणं तारा एयरया विमान दुर्घटना जुइधुंकाः ब्वइगु थाय् व थ्यनेगु थाय्या मौसम सफा मजुइकं आवंलि उडान अनुमति मबीगु निर्णय याःगु खः ।

नेपाल नागरिक उड्डयन प्राधिकरणया प्रवक्ता उपमहानिर्देशक देवचन्द्र लाल कर्णया कथं तारा एयरया विमान दुर्घटना जुइवं क्यानं इनरुटया मौसम सफा जूसां नं उडान अनुमति मबीगु निर्णय याःगु खः । इनरुट धायेबलय् विमान ब्वइगु थाय्, विमान थ्यनीगु थाय् व उडानया लँपुयात समेत कःघानातःगु रुटयात धाइ । उगु फुक्कं थासय् मौसम सफा मजूतले उडानया अनुमति मबीगु निर्णय जूगु खँ प्राधिकरणं धाःगु दु ।

थ्वहे झ्वलय् तारा एयरया विमान दुर्घटना जूगु थासं झिंनिम्हेसिया सीम्ह म्हिगः येँय् हःगु दु । शव पोस्टमार्टमया नितिं शिक्षण अस्पताल यंकूगु दु ।