निहिरा वज्राचार्य यलया न्हूम्ह कुमारी

यलय् न्हूम्ह कुमारी कथं निहिरा वज्राचार्ययात ल्यःगु दु । सोमवाः छगू कथं धेंधेंबल्लाः यानाः निहिरायात कुमारी ल्यःगु खः ।
रत्नाकर महाविहारय् कुमारी ल्ययेगु झ्वलय् वज्राचार्य कूलया न्याम्ह मस्त मध्ये निहिरायात यल तलेजुया पुजारीपिंसं कुमारी कथं ल्यःगु खः । आः ल्यःम्ह कुमारी गाःबहाःया निरजरत्न व मोहिनी वज्राचार्यया म्ह्याय् खः ।
तलेजुया पुजारीपिंसं कुमारी जुइगु निंतिं हःपिं न्याम्ह मस्तय् जातःया लिसें उमिगु म्हय् घाः खू दु मदु, वा मिले जू मजू आदि स्वःगु खः । अन्तय् तलेजुया मू पुजारी अनन्त ज्वालानन्द राजोपाध्यायया छेँय् यंकाः गोप्य पुजा यायेधुंकाः मू पुजारीया जहानपाखें कुमारी जुइम्ह ल्यःगु खः ।
न्हूम्ह कुमारी ल्यःम्ह निहिरायात वइगु फागुन ५ गते शनिवाः कुमारी आसनय् बिज्याइ । थौंकन्हय् युनिका वज्राचार्य कुमारी जुयाबिज्यानाच्वंगु दु ।

किपा साभार- अनलाईनखबर