बौद्ध विदुषी वज्राचार्यया सफू पिदन

येँ(नेपालभाषा टाइम्स)- बौद्ध विदुषी सुमति वज्राचार्यं च्वयादीगु ‘विशुद्ध पञ्चस्कन्ध नै पञ्चबुद्ध’ नांया सफू पिदंगु दु । च्वमि वज्राचार्यं थनिं खुदँ न्ह्यः नेपालभाषां च्वयादीगु सफूयात भाय् हिलाः उगु सफू पिथनादीगु खः । खबर मिडिया प्रा.लिं च्वमि वज्राचार्यं ०७५ सालय् नेपालभाषा च्वयाः पिथनादीगु सफूयात हे खस भासं अनुवाद यानाः पिथंगु खः ।

ज्याझ्वलय् नवासें त्रिभुवन विश्वविद्यालय बौद्ध अध्ययन केन्द्रीय विभागया प्रमुख डा. चन्द्रकला घिमिरें म्हया प्रकृति थुइकेगु व थःत थम्हं लिफः स्वयाः अध्ययन यायेगु बुद्ध दर्शनया मुख्य अभिप्राय सफुतिइ दुथ्यानाच्वंगु खँ कनादिल ।

लुम्बिनी बौद्ध विश्वविद्यालयया पुलांम्ह उपकुलपति प्रा. डा. हृदयरत्न वज्राचार्यं बौद्ध दर्शनया अध्ययन नापनापं उकिया गुह्य पक्ष थुइकेत योग्य गुरुपिनिगु मार्गनिर्देशन आवश्यक जू धयादिल ।
भोट भाय्या विज्ञलिसें सफूया अनुवादक पुण्यप्रसाद पराजुलीं विश्वविद्यालयया शोधकर्तालिसें विदेशी पर्यटक व अध्ययनकर्ताया जक मखेि पथप्रदर्शनकया लजगाः ज्वना च्वंपिनिगु निंतिं सफू उपयोगी जुइगु विश्वास प्वंकादिल ।