धर्मोदयया अध्यक्ष प्रा. यज्ञमानपति

येँ – नेपाःया बौद्ध धर्मावलम्बीतय् राष्ट्रिय संस्था धर्मोदय सभाया अध्यक्षय् बौद्ध विद्वान यज्ञमानपति वज्राचार्य मनोनयन जुयादीगु दु । धर्मोदय सभाया वंगु शनिवाः च्वंगु विशेष मुँज्यां वय्कःयात अध्यक्षया निंतिं सर्वसम्मतं ल्यःगु खः ।धर्मोदय सभाया परम्पराकथं थुगुसी वज्रयानपाखें अध्यक्षता यायेगु पाःकथं भाजु वज्राचार्ययात मनोनयन याःगु खः ।

भाजु वज्राचार्य महालेखा परीक्षणया पुलांम्ह नियन्त्रक खःसा वय्कलं ताहाचल क्याम्पसय् अध्यापन नं यानादी । वय्कः नेपालभाषा एकेदेमिया प्राज्ञ व चचाप्याखंया गुरु नं खः ।

२०७२ सालया तःभुखाचं पाःताः जुइक दुंगु ऐतिहासिक मरुसतःया निर्माणकाल निर्धारण यायेगु ज्याय् महत्वपूर्ण योगदान बियादीम्ह वय्कलं बुद्ध धर्मसम्बन्धी आपालं सफू नं च्वयादीगु दु । लिपांगु इलय् वय्कलं येँया बुद्धधर्मयात च्वन्ह्याकेगु ज्याय् न्हूपिं ल्याय्म्ह वज्राचार्यतय्त परिचालन यासें तालिम बीगु लगायतया थीथी कथंया न्हूगु ज्याझ्वःत न्ह्याका वयाच्वनादीगु दु ।