न्हूगु भेरियन्टपाखें सतर्क जुइत विश्वयात इनाप
येँ -विश्व स्वास्थ्य संगठनं कोरोनाया न्हूगु भेरियन्ट विश्वन्यंकं न्यना वने फइगु सम्भावना दु धासें फुक्कं राष्ट्रयात माःगु तयारी यायेत अपिल याःगु दु । उकथं हे जोखिम पुचःयात खोप कायेकेमाःगु खँ नं धाःगु दु ।
म्हिगः न्हूगु भेरियन्ट बारे प्राविधिक ब्रिफ्रिङ यासें विश्व स्वास्थ्य संगठनं धाःगु दुु, ‘ओमिक्रोन भेरियन्टं उत्पन्न जुइ फइगु विश्वव्यापी जोखिम तसकं तच्वः । ओमिक्रोन स्पाकय् जुइगु उत्परिवर्तन अभूतपूर्व दु व महामारीयात अझ ताःहाकः याना बीफुगु कारणं चिन्ताया विषय जुयाच्वंगु दु ।’
उकथं हे संगठनं ओमिक्रोन लगायत फुक्कं भेरियन्टयात कयाः निगरानी अप्वयेकेत व फयां फक्व याकनं खोप कायेकेगु ज्यायात तीव्रता बीत नं अपिल याःगु दु । महामारी विरुद्धया लडाइँ ल्वायेत मास्क छ्यलेगु भौतिक दुरी कायम यायेगु महत्वपूर्ण जुइगु खँ नं धाःगु दु ।
शुरुइ दक्षिण अफ्रिकाय् म्हसीकूगु ओमिक्रोन आः तक ११ गू देशय् न्यना वनेधुंकूगु दु । उकथं हे संगठनं ओमिक्रोनया सामथ्र्य थुइकेत थप अनुसन्धान यायेमाःगु खँ नं धाःगु दु ।
थ्वहे झ्वलय् नेपाःया थीथी नाकाय् जूगु एन्टिजेन परीक्षणय् पोजिटिभ खनेदुगुलिं थप नमुना संकलन यानाः जीन सिक्वेन्सिङया नितिं राष्ट्रिय जनस्वास्थ्य प्रयोगशाला छ्वयेत स्वास्थ्य सेवा विभागं हेल्थ डेस्कयात इनाप याःगु दु ।
नेपालय् कोरोना संक्रमण म्हो जुया वनाच्वंगु खःसां नं दक्षिण अफ्रिका लगायत मेगु देशय् नं ओमिक्रोन खनेदुगुलिं सजगता नालेत तयारी यानाच्वंगु दु ।
LEAVE YOUR COMMENTS