पशुपतिइ विरुपाक्षया मूर्ति स्यंकेगु कुतः

येँ – पशुपतिइ च्वंगु विरुपाक्षया मूर्तियात छुं न्हि न्ह्यः छम्ह मिसां स्यंकेगु कुतः याःगु खँ सीदुगु दु । सामाजिक सञ्जालय् अपलोड याःगु छगू भिडियोपाखें थ्व सीदुगु खः । अपलोड याःगु भिडियोय् उम्ह मिसां ‘गगन थापायात…’ धासें विरुपाक्षया मूर्तिइ सिं छ्यानाच्वंगु खः । भिडियोलय् देगलय् पिने च्वनाच्वंपिं मनूतय्सं धाःसा मूर्तिइ आक्रमण याये मते धयाच्वंगु खःसा मूर्तिइ आक्रमण यायेधुंकाः मिसा देगलं पिहां वंगु खः ।

आर्यघाट लिकसं दुगु व पशुपति क्षेत्रया दकलय् महत्वपूर्ण थासय् जूगु घटनायात कयाः पशुपति विकास कोषं धाःसा छुं मसिउगु खँ धाःगु दु । उम्ह मिसां आक्रमण याःसां मूर्तिइ क्षति धाःसा मजूगु खँ धाःगु दु । न्हिथं तालं ग्वया तइगु उगु देगलय् उम्ह मिसा गुकथं वन धइगु न्ह्यसः धाःसा ब्वलंगु दु । तालं ग्वयातइगु देगलय् उम्ह मिसा अःपुक दुहां वंगु खनेदुगुलिं थ्व कोषया लापर्वाही जूगु द्वपं स्थानीय जनतां बिउगु दु ।

भिडियो सार्वजनिक जुइवं उम्ह मिसायात कारबाही यायेमाःगु व मूर्तिया सुरक्षा जुइमाःगु स्थानीय जनतां धाःसां उम्ह मिसा धाःसा मानसिक सन्तुलन स्यंम्ह धाःगु दु । कोषं मूर्तिया सुरक्षा यायेगु निंतिं माःगु पलाः ल्ह्वनेगु खँ धाःगु दु । कलियुगया ई अप्वया वनेवं विरुपाक्षया मूर्ति जमिन स्वयां थहां वइगु जनविश्वास दु । कलियुग पूवनेवं मूर्ति पूवंक हे जमिनय् थहां वइगु जनविश्वास दु । उगु मूर्ति नेपाःया हे दकलय् पुलांगु मूर्ति कथं कायेगु यानातःगु दु ।