स्वनिगःया सर्गतय् ध्याचःगु वा !

नेपालभाषा टाइम्स
११३८ तछलाथ्व तृतीया
- बुखँ
- राष्ट्रिय
किपा-प्रकाश श्रेष्ठया फेसबुकपाखें

येँ – भारतया राजस्थान जःखः क्षेत्रया धू सहित वःगु समुद्री वाफय् नेपाःया वायुमण्डलय् ल्वाक ज्यायेवं म्हिगः स्वनिगःया थीथी थाय् चाति थेंज्याःगु वा वःगु दु । मौसम पूर्वानुमान महाशाखाया मौसमविद् मनीकुमार अर्यालं धाः कथं पश्चिमी वायुया प्रभावया कारणं उगु धू उच्च वायुमण्डलय् प्रवेश याःगुलिं मध्यपहाडी भेग व दक्षिणपाखेया भू–भाय् चाति थेंज्याःगु वा खः ।

उच्च वायुमण्डलय् धूया कण अझ नं दुगुलिं मेगु निन्हु स्वन्हु उकथं हे वा वइगु जानकारी नं वय्कलं बियादीगु दु । मौसमविद्या भाषाय् ‘डस्ट स्ट्रोम’ धाइगु वर्षा भारतया राजस्थान, दिल्ली जुयाः नेपाः दुहां वःगु थ्व सम्भवतः न्हापांखुसी खः । थुगु चाति थेंज्याःगु वां स्वास्थ्यय् तकं लिच्वः लाके फइगु जूगुलिं थ्व वां मदायेकेत नं विज्ञतय्सं धाःगु दु ।

स्वनिगः लिसें आपालं थासय् आकासं वःगु लः मुंकाः छ्यलेगु नं यानाच्वंगु दु । तर आः वयाच्वंगु वाति लः ममुंकेत मौसमविद् अर्यालं सर्वसाधारणयात इनाप यानादीगु दु । चाति थेंज्याःगु लखय् रसायनिक तत्वया समिश्रण जुइ फइगु खतरा दुगुलिं अज्याःगु लः मछ्यलेत वय्कलं सुझाव बियादीगु दु । वय्कलं धयादी, ‘मनसुनया इलय् थ्व अजूचायापुगु कथंया वा नेपालय् दकलय् न्हापांगु जूगुलिं जिपिं मौसमविद् नं अजू चायाच्वनागु दु, थज्याःगु वर्षा जूगु रेकर्ड झीके मदु, थन हिउँदया इलय् निन्हु स्वन्हु खसु वयाच्वनीगु इलय् फाट्टफुट्ट खनेदुगु खः, तर भारतया राजस्थानय् ‘डष्ट स्ट्रोम’ जुयाच्वनी ।’

वय्कःया कथं नेपालय् आः मनसुन धाःसा सुरु जुइ फयाच्वंगु मदु । नेपालय् मनसुन शुरु जुइत पश्चिमी वायुया प्रभाव पूवंके चिला वनेमाः ।