ने. सं. ११४४ कौलाथ्व षष्ठी -

घर न घाट जुइवं न्हूगु पार्टी

येँ- नेकपा (एकीकृत समाजवादी) पार्टीया संयोजक माधव नेपालं एमालेया अध्यक्ष केपी ओली शर्मा थःपिंत ‘घर न घाट’ दयेकेगु षडयन्त्र याःगुलिं हे उकियात फायाः थःपिंसं न्हूगु पार्टी नीस्वनागु खँ धयादीगु दु । म्हिगः पत्रकारलिसे खँ ल्हासें वय्कलं एमाले अध्यक्ष ओलीं एमालेयात प्राइभेट कम्पनी दयेकेगु ज्या याःगुलिं थःपिसं विद्रोह यायेमाःगु खँ नं कनादीगु दु ।

ओलीया नेतृत्वय् एमाले छुं नं कथंया सुधार जुइगु लक्षण खनेमदुगुलिं थःपिंसं न्हूगु राजनीतिक शक्ति दयेकगु खँ न्ह्यथँसें वय्कलं धयादिल, ‘घर न घाटया जुइगु अवस्था खनेदयेवं न्हूगु पार्टी दयेकेगु बारे सहलह जुल, छुं पासापिं सहमत जुयादिल, छुं पासापिंसं पार्टी तछ्याये मजिउ धयादिल, छुं पासापिंसं याकनं पार्टी चायेकेमाः धकाः सः थ्वयेकादिल ।’

२०७५ सालया जेठ २ गतेय् लिहां वनेगु धकाः ओलीं त्वहः जक दयेकाच्वंगु द्वपं बिसें पार्टीयात छप्पँ जुइके मबीगु व अलमल जक याना तयेगु नियत खनेधुंकाः थःपिंसं पार्टीइ विद्रोह यानाः न्हूगु पार्टी चायेकागु खँ नं वय्कलं स्पष्ट यानादिल । इतिहासय् थज्याःगु विद्रोह बारम्बार जूगु दु धासें वय्कलं धयादिल, ‘निक्वःगु महाधिवेशनय् केशरजंगपाखें रुपान्तरण सम्भव मदु धकाः हे पुष्पलालं विद्रोह यानादिल, थज्याःगु विद्रोह तःक्वः जूगु दु ।’

ओलीं थःगु पद धरापय् लाइ धइगु थुइधुंकाः संसद विघटन याःगु द्वपं बिसें वय्कलं धयादिल, ‘छम्ह हे प्रधानमन्त्रीं निक्वः तक संसद विघटन याःगु इतिहास गन दु ? संसद ल्यंकेत जिमिसं पार्टी दुने विद्रोहया सः थ्वयेका । केपी ओलीयात प्रधानमन्त्रीं चीकेमाः धइगु निष्कर्षय् थ्यनेधुंकाः कांग्रेस, माओवादी केन्द्र, जसपा व राष्ट्रिय जनमोर्चा लिसे सहकार्य यानाः जिमिसं संसद, लोकतन्त्र व संविधान ल्यंकेगु ज्या याना ।’

एमालें थः सहित झिंप्यम्ह सांसदयात निष्काशन यायेधुंकाः थःपिंके न्हूगु दल दयेकाः न्ह्याः वनेगु बाहेक मेगु विकल्प मदु धासें वय्कलं धयादिल, ‘थज्याःगु अवस्थाय् कि पुलिं चुयाः वने माल, कि मखुसा मेगु क्रान्तिकारी पार्टी दयेके माल । आः नं जिमिसं एकताया च्याप्टर बन्द यानागु मदु, मुक्कं देय्यात एकतावद्ध, कम्युनिष्ट आन्दोलनयात एकतावद्ध यायेगु जिमिगु अभियान खः ।’