महानगरया दक्वं वडाय् ५० दँ च्वय्या नागरिकया निंतिं खोप केन्द्र

येँ – येँ महानगरपालिकां दक्वं वडाय् कोरोना भाइरस (कोभिड–१९) विरुद्धया खोप केन्द्र तइगु जूगु दु । महानगरं ५० दँय् च्वय्या उमेर समूहया नागरिकयात कोरोना विरुद्धया खोप बीत महानगरया स्वीनिगुलिं वडाय् खोप केन्द्र तयेगु निर्णय याःगु खः ।

जिल्ला खोप अनुगमन तथा व्यवस्थापन समितिया आः नकतिनि च्वंगु बैठकं उगु निर्णय याःगु खः । येँ जिल्लाया प्रमुख जिल्ला अधिकारी कालीप्रसाद पराजुलीया अध्यक्षताय् च्वंगु समितिया बैठकं ५० दँ च्वय्या नागरिकयात खोप बीगु निंतिं येँ महानगरया दक्वं वडाय् खोप केन्द्र तयेगु निर्णय याःगु खः ।

अत्यावश्यक सेवाया व्यक्तिया निंतिं वीर अस्पताल, सामाखुसिइ च्वंगु राधास्वामी आइसोलेसन सेन्टर, न्हू बानेश्वरय् च्वंगु निजामति कर्मचारी अस्पताल, महाराजगंजस्थित त्रिवि शिक्षण अस्पताल, टेकुया शुक्रराज ट्रपिकल तथा सरुवा रोग अस्पतालयात खोप केन्द्र क्वःछिउगु दु ।

थुकियालिसें येँ जिल्लाया मेमेगु स्थानीय निकायया हकय् सम्भव दत्तले लिक्कसं च्वंगु स्वास्थ्य केन्द्रय् वा संस्थाय् खोप केन्द्र तयेगु नं समितिया बैठकं निर्णय याःगु दु ।
थुकथं हे फरक क्षमता व अपांगता जूपिं व्यक्तिया निंतिं नं बिस्कं खोप केन्द्र संचालन यायेगु समितिं निर्णय याःगु दु । समितिं अज्याःपिं व्यक्तिया निंतिं भेरोसेल खोप बीगु ज्याझ्वः अन्तर्गत खोप संचालन जुइगु इलय् लिक्कं लाःगु खोप केन्द्र वा मेगु पायक जुइगु थासय् खोप केन्द्र संचालन यायेगु निर्णय याःगु खः ।

उगु बैठकं खुम्हेसिया छगू खोप अनुगमन समिति नं गठन याःगु दु । जिल्ला समन्वय अधिकारी पिताम्बर अधिकारीया संयोजकत्वय् गठन याःगु खुम्हेसिया खोप अनुगमन समितिइ जिल्ला प्रशासन ज्याकू, महानरीय प्रहरी परिसर, सशस्त्र प्रहरी बल, जिल्ला स्वास्थ्य ज्याकू व येँ महानगरपालिकाया प्रतिनिधि च्वनादीगु दु ।