माइक्रोया ठक्करं छम्ह सित, प्यम्ह घाःपाः

येँ – थनया सामाखुसिइ म्हिगः न्हिनय् माइक्रोबसं ठक्कर नकाः छम्ह सीगु दुसा प्यम्ह बांमलाक घाःपाः जूगु दु । चक्रपथ रुटय् चले जुइगु बा. १ ज ९७६६ नम्बरया माइक्रोबसं सोमवाः न्हिनय् ११ः४५बजे पाखे ठक्कर नकेवं धुम्बाराहीया न्यय्न्यादँ दुम्ह सीता दाहाल सीगु खः । लँ काटे यानाच्वंम्ह दाहालयात माइक्रों ठक्कर नकेवं सामाखुसिइ च्वंगु अल नेपाल अस्पताल यंकूगु खःसा दाहाल अन हे सीगु खः ।

अथेहे माइक्रोया ठक्करं अल नेपाल अस्पतालय् हे ज्या याइम्ह नर्स सपना राई, कोटेश्वरया सरिता अधिकारी, वया जहान सुशील अधिकारी व लक्ष्मी सापकोटा नं घाःपाः जूगु दु । सापकोटाया अवस्था गम्भीर जुयाच्वंगु खँ धाःगु दु । प्रहरीं माइक्रो चालक ४० दँया टंकराज कार्कीयात ज्वनेधुंकूगु दु ।

मेखे त्रिशुली खुसिइ कुतुं वनाः छम्ह भारतीय सीगु दु । नारायणगढ–मुग्लिन सतकय् लाःगु चितवनया काली खोला धाःथासय् भारतं वःगु बस स्यनाः दयेकाच्वंगु इलय् लँ सिथय् च्वनाः मि पनाच्वंम्ह भारत मध्यप्रदेश वैरचीया ६० दँया हल्के कुशवाह त्रिशुली खुसिइ कुतुं वंगु खः । आइतवाः बहनी कुतुं वंम्ह कुशवाहया सीम्ह सोमवाः १२ः३० बजे पाखे जक त्रिशुली खुसि सिथय् लुइकूगु खः ।