ने. सं. ११४४ कछलागा द्वादशी -

मुख्यमन्त्री विफल जूगु दावी

प्रदेशया नां व राजधानीया प्रस्ताव तकं हयेके मबिउ

येँ – ३ नम्बर प्रदेशया मुख्यमन्त्री डोरमणि पौडेलं आः तक छुं हे गतिलाःगु ज्या याये मफुत धासें स्वयम् सत्तारुढ दलया सांसदतय्सं हे असन्तोष प्वंकाहःगु दु । सरकारं आः तक संसदयात विजनेश तकं बी मफु धासें सांसदतय्सं हेटौंडा वनाः थःपिनि ई जक सितिकं छ्वये थें जुयाच्वन धकाः नं असन्तोष प्वंकेगु यानाच्वंगु दु ।

विशेष यानाः प्रदेशया राजधानी व प्रदेशया नां क्वःछीगु सवालय् मुख्यमन्त्री पौडेलं क्यनाच्वंगु उदासिनतां यानाः सांसदत रुष्ट जुयाच्वंगु खँ सीदुगु दु । प्रदेशया राजधानी व नांया बारे संसदय् प्रस्ताव यंकेगु प्रतिबद्धता मुख्यमन्त्री पौडेलं प्वंकूसां नं प्रतिबद्धता कथं ज्या धाःसा मजूगु द्वपं सांसदतय्सं बीगु यानाच्वंगु दु ।

थःगु नां कने चाहे मजूम्ह छम्ह सांसदं ‘नेपालभाषा टाइम्स’ लिसे खँ ल्हासें प्रदेश सरकार असफल जूगुलिं आः सरकार हे हिलेमाःगु माग समेत यानादीगु दु । सरकारं संसदयात छुं हे बिजनेश मबिसे सांसदतय्गु भूमिका हे गौण याना बिउगु द्वपं नं वय्कलं बियादिल ।

सरकारं प्रदेशया स्थायी राजधानी व नामाकरणया सवालय् मुख्यमन्त्रीं छुं याइ धकाः पियाच्वंसा मेगु प्यदँ लिपा नं ज्या मजुइगु टिप्पणी वय्कलं यानादीगु दु । मुख्यमन्त्री पौडेल मकवानपुरया हेटौंडायात हे स्थायी राजधानी दयेकेमाः धइगु पक्षय् दुसा उकिया लागिं वय्कःया लबिङ समेत दुगु जुयाः वय्कलं थ्व प्रस्तावयात फयांफछि लिछ्यायेत हे स्वयाच्वंगु नं द्वपं लाःगु दु ।

हेटौंडाय् अस्थायी राजधानी तये मजिउ धकाः अधिकांश सांसदतय्सं माग यानाच्वंसां मुख्यमन्त्री पौडेल थः हे हेटौंडायाम्ह जूगुलिं छुं जुयाः हेटौडां राजधानी फुत्के जुयाः वन धाःसा वय्कःया राजनीतिक भविष्य समेत समाप्त जुइगु जुयाः वय्कलं फयांफछि थ्व प्रस्ताव हे हयेके मबीत स्वयाच्वंगु नं द्वपं दु ।

थीथी सांसदतय्सं प्रदेशया नां नेपालमण्डल, नेवाः ताम्सालिङ व गौरीशंकर जुइमाः धकाः प्रदेश सदनय् प्रस्ताव समेत दर्ता याना तयेधुंकूसां सरकारं धाःसा आः तक उकियात सदनय् टेबुल तकं याःगु मदुनि । थुकिं यानाः आः सहमतिया नामय् थ्व प्रदेशया नां नं च्वं हे बिया हइगु सम्भावना अप्वःगु दु । यदि पार्टीया हाइकमाण्डपाखें प्रदेशया नां वल धाःसा थुगु लागाया पहिचान खने दइ कथं मजुसे छुं खुसिया नामं प्रदेशया नां च्वने फइगु खँ धाःगु दु ।