ने. सं. ११४४ ञलाथ्व नवमी -

शिक्षा विधेयकय् मांभाय् शिक्षा

येँ (नेपालभाषा टाइम्स)-संसदय् विचाराधीन जुयाच्वंगु शिक्षा विधेयकय् मातृभाषा शिक्षाया व्यवस्था यायेमाः धकाः नं संशोधन प्रस्ताव दर्ता जूगु दु । राष्ट्रिय स्वतन्त्र पार्टीया सांसद विराजभक्त श्रेष्ठं म्हिगः संसदीय समितिया बैठकय् थ्व संशोधन प्रस्ताव दर्ता यासें मातृभाषा शिक्षाया महत्व बारे नं कनादीगु खः । प्रस्तावित विधेयकया परिच्छेद २ दफा ७ य् मातृभाषां शिक्षा सुनिश्चित यायेगु लागिं ‘मातृभाषा शिक्षा’ धइगु बुँदा नं थपे याकेगु ज्या जूगु खः ।

मातृभाषां शिक्षाया संशोधन बुँदा थपे याकुसें सांसद श्रेष्ठं देशय् संघीय व्यवस्था वयेधुंकाः भाषाया अधिकार मबिल धाःसा हानं नं द्वन्द्व ब्वलनीगु खतरा दु धासें वय्कलं थ्व समस्या समाधान यायेगु लागिं नं मातृभाषां शिक्षा अनिवार्य यायेमाःगु खँ तयादीगु खः । मातृभाषाया अधिकार बीगु झ्वलय् आः नकतिनि हे बागमती प्रदेश सरकारं नेपालभाषा व तामाङ भाषायात सरकारी ज्याखँया भाषा धकाः मान्यता बीगु कानुन पारित याःगु प्रशंग न्ह्यथँसें वय्कलं आः सरकारं हे मातृभाषायात कानुनी मान्यता प्रदान यायेधुंकूगु अवस्थाय् थ्व भासं ब्वंकेगु व्यवस्था नं यायेमाः धकाः वय्कलं बः बियादीगु खः ।

लुमंकेबहः जू, सरकारं तयार याःगु स्थानीय तहया शिक्षा सम्बन्धी कानुनय् नं मातृभाषाया व्यवस्था यायेत पुलांम्ह मन्त्री राजेन्द्र श्रेष्ठं संशोधन प्रस्ताव तयादीगु खः । वय्कलं यानादीगु संशोधनया लिच्वः कथं येँ महानगरपालिकां स्थानीय तहलय् स्थानीय विषय मांभासं ब्वंकेगु निर्णय यानाः नेपालभाषा ब्वंकेगु ज्या न्ह्याकूगु खः । आः मेमेगु स्थानीय तहतय्सं नं थ्व ज्या न्ह्याकाच्वंगु दु ।

‘हियात ध्यबालिसे हिले मजिल’
थौं राष्ट्रिय रक्त सञ्चार दिवसया लसताय् नेपाल स्वयंसेवी रक्तदाता समाजं देसय् आपालं हिदातातय्सं निःशुल्क रुपं दान याइगु हि आवश्यकपिं मनूतय्त नं निःशुल्क हे उपलब्ध याकेमाःगु माग याःगु दु । समाजया अध्यक्ष प्रेमसागर कर्माचार्यं म्हिगः छगू वक्तव्य जारी यासें हिदातातय्सं निःशुल्क दान यानातःगु हि थीथी कथंया नां बियाः शुल्क कायेगु ज्या यानाच्वंगुलिं थ्व ज्या बन्द यायेमाः धकाः माग यानादीगु खः ।

थौंकन्हय् हिदान यायेगु ज्या पेशेवार हिदातातय्गु वर्चश्वय् लानाच्वंगु खँ धासें वय्कलं हि उपलब्ध याकेगु ज्याया गुणस्तर बढे याना यंकेमाःगु खँ कनादीगु दु । झीगु देशय् हिदान ज्याझ्वःया इतिहास तसकं पुलां जू धासें वय्कलं हिदानया इतिहासय् नां दुपिं सकसित सुभाय्् देछानादिल । लिसें हियात ध्यबालिसे हिलेगु प्रवृत्ति बन्द यायेमाःगु सुझाव नं बियादीगु दु ।