खान स्टारत फ्लप जूगु दँ

इस्वी संवत् कथं २०१८ या दँ क्वचाल । थ्व दच्छिया दुने बलिउडय् निसःसिबें अप्वः फिल्म रिलिज जुल । उकी मध्ये गुलिखे फिल्म फ्लप जुलसा छुं छुं फिल्मजक हिट जुल । दकलय् अजूचायापुसे च्वंगु खँ थुगुसी छु जुल धाःसां बलिउडया स्वम्ह खान स्टारया रुपय् बय्बय् जुयाच्वंपिं शाहरूख खान, आमिर खान व सलमान खानया फिल्म फ्लप जुल ।

स्वकुमिया नुगः सालेत ‘फेल’ जुल । ई.सं.२०१८ सालय् दकलय् न्हापां सुल्तान खानया रुपय् नांजाःम्ह सलमान खानया “रेस थ्री” फिल्म रिलिज जुल । बीग बजेट “रेस थ्री” या बजेट २०० करोडसिबें अप्वः तू, तर थ्व फिल्मं १६९ करोडसिबें अप्वः कमे याये मफुत । तूगु लाय्सिबें म्हो जक आम्दानी जूबलय् थ्व फिल्मयात फ्लप फिल्म धकाः घोषणा यात ।

अनंलिपा मेम्ह खान स्टार आमिर खानया “ठग्स अफ हिन्दुस्तानं” नं स्वकुमिया नुगः त्याके मफुबलय् फ्लप जुल । सन् २०१८ सालया दकलय् लिपांगु वाःपाखे बादशाह खानया रुपय् नांजाःम्ह शाहरूख खानया “जिरो” रिलिज जुल । थ्व फिल्मया बजेट नं २०० करोड खः, तर फिल्म रिलिज जुया झिंनिन्हु पूवंकूगु ईतक थ्व फिल्मं भारत दुने मुक्कं ९२ करोड तका जक कमे यायेत ताःलाःगु दु । थ्व फिल्मया वल्र्डवाइड कलेक्शन स्वयेगु खःसा थ्यंमथ्यं २०० करोड तक थ्यने धुंकूगु दु ।

१०० करोड कमे याःसां फ्लप
विशेष यानाः बलिउडय् १०० करोड दां कमे याःगु फिल्मयात हिट फिल्मया दर्जाय् तइगु खः, तर थुगुसी अथे मजुल । स्वम्ह खान स्टारतय्गु फिल्मं १०० करोडसिबें अप्वः कमे याःगु खःसां थःगु तूगु लाय् हे सालेमफुबलय् फ्लप फिल्मया रुप काःगु दु ।

सुपरस्टार आमिर खान व मेगास्टार अमिताभ बच्चन दकलय् न्हापांखुसि छगू हे फिल्मय् खनेदयेकःवःगु “ठग्स अफ हिन्दुस्तान”या लाय् धइगु ३००करोड खःसा थ्व फिल्मं थ्यंमथ्यं १४४ करोडति जक कमे याःबलय् फ्लप फिल्मया रुप काल ।

हिट व सुपर हिट फिल्म
थुगुसी छखे स्वम्ह खानया तसकं बय्बय् जूगु बीग बजेटया स्वंगुलिं फिल्म फ्लप जुलसा मेखे कम बजेटं दयेकूगु “स्त्री”, “सुुई धागा”, “अन्धाधुन”, “हिचकी”, “सोनु के तितु के स्वीटी”, “परमाणु”, “केदारनाथ”, “धडक” व “वीरे डि वेडिंग” नांयागु झिगू फिल्मं स्वकुमिया नुगः याउँक त्याकल अले हिट फिल्मया धलखय् लात ।

विशेष यानाः बलिउडय् १०० करोड दां कमे याःगु फिल्मयात हिट फिल्मया दर्जाय् तइगु खः, तर थुगुसी अथे मजुल । स्वम्ह खान स्टारतय्गु फिल्मं १०० करोडसिबें अप्वः कमे याःगु खःसां थःगु तूगु लाय् हे सालेमफुबलय् फ्लप फिल्मया रुप काःगु दु

थुलि फिल्म हिट जुलसा थ्व बाहेक थुगसी सुपर हिट जूगु फिल्मय् बलिउडया छम्ह स्टार संजय दत्तया जीवनीइ दयेकूगु बायोपिक “सन्जु”या नां दकलय् न्ह्यःने लात । करिब १०० करोडति लाय् तूगु थ्व फिल्मं मुक्कं ३४० करोडसिबें अप्वः दां कमे यानाः सुपरहिट फिल्म जुलसा थुगुसी सुपरहिट फिल्मया धलखय् लाःगु मेमेगु फिल्मय् “बधाई हो” , “पद्मावत”, “बागी थ्री” व “२.०”या नां न्ह्यःने लाःवःगु दु ।

उकी मध्ये “२.०”नांयागु फिल्म धाःसा दक्षिण भारतया भाषां दयेकूगु फिल्म खःसा थुकी साउथ सुपरस्टार रजनीकान्त व बलिउडया स्टार अक्षय कुमारं म्हितूगु दु । थुकिया हिन्दी भर्सनं जक १८८ करोड तका दां कमे यानाः हिन्दी फिल्मया रुपय् नं सुपरहिट जूगु फिल्म खः । मुक्क ५४३ करोड तका तूगु “२.०” नांयागु थ्व फिल्मयात भारतया आःतकया दकलय् अप्वं दां तूगु फिल्म कथं कयातःगु दु ।

टप फ्लप फिल्म
थुगुसी फ्लप जूगु चर्चित फिल्मय् अमिताभ बच्चन व ऋषि कपुर दुगु “१०२ नटआउट”, शाहिद कपुरया “बत्ती गुल मिटर चालु”, सैफ अली खानया “बाजार” व “कालाकण्डि”, काजोलया “हेलिकोप्टर ईला”, सनी लियोनया “हेट स्टोरी ४”, अभिषेक बच्चनया “मनमर्जियां”, धर्मेन्द्र व वया काय्पिं सनी देओल, बबी देओल दूगु “यमला पगला दिवाना फिरसे” या नापनापं बोर्डर, गुलामी थेंज्याःगु फिल्म दयेके धुंकूम्ह निर्देशक जे पि दत्ताया “पल्टन”या नां दकलय् न्ह्यःने लानाच्वंगु दु ।

थुगुसीया स्टार
थुगुसीया हिट व फ्लप जूगु फिल्मया लिधंसाय् चर्चा यायेगु खःसा थुगुसी रणवीर नांयापिं निम्ह स्टारया नां हिट स्टारया रुपय् न्ह्यःने लाःवल । उकी मध्ये रणवीर कपुरया “सन्जु” फिल्मं थुगुसीया दकलय् अप्वः दां कमे यानाः रेकर्ड तःगु जक मखसे छम्ह कलाकारया रुपय् नं रणवीर कपुरं तसकं हे जीवन्त अभिनय यानाः सकसिगुं नुगः त्याकूगु दु ।

मेम्ह रणवीर यानिकि रणवीर सिंहं नं “पद्मावत” फिल्मय् याःगु नेगेटिभ रोलयात आपाःसिनं तारीफ याःगु दु । थ्व नं थुगुसीया सुपर हिट फिल्म खः । ई.सं.२०१८या दकलय् लिपांगु वालय् रिलिज जूगु “सिम्बा” नं हिट जूबलय् रणबीर सिंहयात नं थुगुसीया स्टारया दर्जा बिउगु दु । थुगुसी ‘बधाई हो’ व ‘अन्धाधुन’या हिरो आयुष्मान खुराना, ‘स्त्री’या हिरो राजकुमार राव अले ’सुई धागा’ व ‘अक्टोबर’या हिरो बरुण धवनया नां नं हिट स्टारया रुपय् न्ह्यःने वःगु दु ।

विशेष यानाः बरुण धवनया आतक छगू नं फिल्म फ्लप मजुनी धइगु खँ चर्चाया विषय जुयाच्वंगु दु । हिरोइनतय्गु चर्चा यायेबलय् थुगुसी “पद्मावत”या हिरोइन दीपिका पाडुकोणयात मेपिंसं त्याके थाकुल । थुगुसी आलिया भट्टया “राजी” नं १२० करोड दां कमे यानाः सुपरहिट धायेकेत ताःलाःगु फिल्म खःसा थुकी आलियाया ज्याया नं तसकं हे तारीफ जूगु खः ।

दिपिका व आलिया धुंकाः “वीरे डि वेडींग”या हुनिं करिना कपुर, “स्त्री”या हुनिं श्रद्धा कपुरया नां टप स्टारया धलखय् लानाच्वंगु दु । तर “सुईधागा” फिल्मय् तसकं हे नुगलय् थीकथं अभिनय यानाः अनुष्का शर्मां थःगु न्हाय् धस्वाकेत ताःलाःगु दु । अनुष्काया ‘परी’ व ‘सन्जु’ फिल्मय् नं च्वछायेबहगु ज्या खनेदुगु ल्याःकथं अनुष्का शर्माया नांमं बिस्कं कथंया थाय् काःगु दु । शाहरूख खानया फ्लप फिल्म धकाः धाःगु “जिरो” फिल्मय् तकं वयागु रोलयात तारीफ हे याःगु दु ।

पुलांगु पुस्ताया स्टार
खान पुस्ताया थासय् न्हू पुस्ताया उदय जुयावःगु ई कथं चर्चा जुयाच्वंसां पुलांगु पुस्ताया स्टार कथं कयातःपिं मध्ये अक्षय कुमारं “२.०” फिल्मय् म्हितूगु रोलयात आपाःसिनं ययेकूगु दुसा अक्षय कुमारया थुगुसी “गोल्ड” हिट जुलसा “पाय्डम्यान” नं एभरेज हिट फिल्म घोषित जूगु दु ।

अथे हे अजय देवगनया “रेड” नांयागु फिल्म नं हिट हे जुलसा जोन अब्राहमया “सत्यमेव जयते” हिट व “परमाणु” एभरेज हिट घोषित जूगु फिल्म खः । पुलांपिं स्टारय् थुपिं हिट जूसां छगू जमानाया एक्शन स्टार सनी देओलया थुगुसी पिदंगु “भैयाजि सुपरहिट” व “मोहल्ला अस्सी” निगुलिं सुपरहिट ला छु, हिट तकं मजुलसा पुलांम्ह कमेडी किंग स्टार गोविन्दाया “फ्राईडे” व “रंगीला राजा” निगुलिं फ्लप हे जुल ।

थ्वहे पुस्ताया अनिल कपुरया “रेस थ्री”, “मुबारकां” व “फन्नेखाँ” नं फ्लप हे जुलसा “फन्नेखाँ” फिल्मय् हे म्हितूम्ह पुलां पुस्ताया हिरोइन ऐश्वर्या राय बच्चनया पलाः नं क्वातुइ मफुत । बरु थ्वहे पुस्ताया हिरोइन रानी मुखर्जीया “हिचकी” धाःसा स्वकुमिया नुगः त्याकेत ताःलात ।

न्हू पुस्ताया उदय
बलिउडय् पुलांगु पुस्ताया थासय् न्हूगु पुस्ताया उदय जुयावःगु याउँक हे खनेदयाच्वंगु दु । उलि जक मखसे बाखंया शैली नं न्हापा न्हापाया थें मजुसे बिस्कं सवाःया जुया वयाच्वंगु नं खनेदु । न्हू पुस्ताया स्टारय् टाइगर श्राफं सकसिगुं नुगः त्याकाच्वंगु दु । थुगुसी वयागु “बागी २” फिल्म ६० करोडतका लाय् तूगु खःसा १५९ करोड तका कमे यानाक्यंगु फिल्म खः ।

न्यू इण्ट्रि जूपिं हिरोत मध्ये शाहिद कपुरया चिरीमांया काय् ईशान खट्टर “धडक” फिल्मय् श्रीदेवीया म्ह्याय् जान्हवी कपुरलिसे हिरो जुयाः बलिउडय् दुहां वल । थ्व फिल्म हिट जूबलय् उमित राइजिंग स्टारया रुपय् काःगु दुसा थुगुसी सालया दकलय् लिपांगु महिनाय् बलिउडय् इण्ट्रि याःम्ह सारा अलि खान धइम्ह सैफ अलि खानया अमृता सिंहपाखें दुम्ह म्ह्याय् खः ।

सारा अलि खानया डेब्यु फिल्म “केदारनाथ” नं हिट हे जुल । थःगु न्हापांगु फिल्मय् हे थःके स्टार जुइगु गुण दु धका क्यनेत सफल जूम्ह सारा अलि खानया मेगु फिल्म “सिम्बा” नं हिट फिल्म हे जुइगु लँपुइ लाना च्वंगुलिं सारा अलि खानया भविष्य बांलाः धकाः धाइपिं यक्व हे दु । आः श्रीदेवीया म्ह्याय् जान्हवी कपुर व सारा अलि खानया भविष्य गुखेपाखे स्वइ धइगु खँ ला लिपा हे जक सीदइ । आः थथें धाये फइमखु ।