विवादं फिल्म संकटय्

इलय्व्यलय् थीथी कान्डया कारणं चर्चाय् वयाच्वनीम्ह छम्ह बलिउड अभिनेत्री खः कंगना रनावट । सन् २००६ लय् प्रदर्शनय् वःगु वयागु संकिपा ‘ग्यांगस्टार’निसें लिपांगु संकिपा ‘सिमरन’ तक थ्यंगु इलय् कंगना ताःहाकःगु हे विवादय् लाःगु दु ।

लिपांगु इलय् ‘मणिकर्णिका ः द क्वीन अफ झासी’या कारणं चर्चाय् वयाच्वंम्ह कंगनां छगू इलय् बलिउडया निंतिं सुं नं खान (सलमान, शाहरूख व अमिर)या आवश्यकता मदु धइगु विवादास्पद अभिव्यक्ति तकं बिउगु खःसा थः सुं नं स्टारया लिउलिउ जुयाः ‘हिट’ जुइमाःम्ह मखु धकाः नं धाःगु खः ।

लिपांगु इलय् ‘द क्वीन’ संकिपाया निर्देशक कृषं विशेष कारण क्यनाः संकिपापाखें लिचिलेवं उकिया निर्देशनया भाला कंगनायात बिउगु खः । तर संकिपाया अभिनेता सोनु सूदं ‘कंगनायाके निर्देशकया रुपय् दयेमाःगु योग्यता मदु’ धकाः धासें फिल्म हे त्वःता बिउगु घटना चर्चा जुयाच्वंगु दु ।

बलिउड फिल्म उद्योगय् लिपांगु इलय् दकलय् विवादास्पद अभिव्यक्ति सुनां बियाच्वंगु दुसा व कंगना हे खः । वंगु छुं दँ थुखे बलिउडय् कंगनाया व्यापक रुपं विरोधीत नं अप्वयाच्वंगु दु । कंगना विवादय् लानाच्वंगुलिं ‘द क्वीन’ संकिपा नं संकटय् लानाच्वंगु दु ।