न्हय्म्हम्ह सुद्र्यः व ग्लोबल वार्मिङ

अजूचायापुगु संसार दुने छगू बुखँ पिहां वल । चीनय् छक्वलं स्वंगू सूर्य खनेदत । थुगु दृश्य खनाः वैज्ञानिकत नं अजू चाल । थुकिं पृथ्वीया खास शक्ति दुगु क्यं । खय्त ला थ्व अजूचायापुगु घटना खः । थुकी गुलि सत्यता दु, थ्व माला स्वये ल्यं दनि । थौं विज्ञानं संसार हिला बिल । असम्भवयात सम्भव याना बिल । तर नं प्रकृतियात हिले धाःसा मफु ।

प्रकृतिइ नं हिउपाः वइ । चा, न्हि, सुथ, बहनी । चिकु तांन्वः सकतां हिला वयाच्वनी । थुलि जक मखु । प्रकृतिइ प्रलय नं वइ । गनं अतिबृष्टि जुइ । सुद्र्यः यक्व खने दइगु नं छगू कथं प्रलय हे खः । थुकियात अग्नि प्रलय कथं कायेफु । बौद्ध ग्रन्थया विशुद्धि मार्गय् अग्नि प्रलयया खँ थुकथं न्ह्यथनातःगु दु –

संसारय् दकलय् न्हापां महाबृष्टि जुइ । छचालं बांलाक वा वइ । थ्व खनाः मनूत प्रशन्न जुइ । थःपिंके दुगु पुसा पी । पुसां मा बुया वइ । छुं भचा तमा जुइ । अबले वा वइ मखु । छन्हु निन्हु वा लछि निला जक मखु, दँ दँ तक नं वा वइ मखु । थुकिं मुक्ति जूपिं मनूत देवलोकय् जन्म काः वनी । थुकथं दँदँ तक वा वइ मखु ।

थुकिं यानाः लः सुना वनी । लः मदयेवं जलचर प्राणी संकटय् लाइ । न्या, काउले वाथावाथा कनी । थुपिं मध्ये ध्यानी प्राणी देवलोकय् जन्म काः वनी । ध्यान प्राप्त याये मफुपिं नं दइ । उपिं तसकं पीडित जुइ ।लखौं लख दँ फुइ । लोकब्यूह नांया कायाविचर द्यः पिहां वइ । अतिकं विरुप भेष धारण यानातःम्ह ह्याउँगु वसः पुनातःम्ह ।

थन अनित्य मात्र प्राणी व वस्तु जक मखु ।
संसार हे अनित्य धइगु खँ बोध याकी । थुलिं निन्हु प्यन्हुया लागिं जुइ । गुलिं छुं दँया लागिं । लखौं लख कल्पकल्प हे छाय् मजुइमा छन्हु सकतां वनी । ब्रम्हाण्ड नापं संसार नं तनावनी । थुकियात सुनां पने फइ मखु । सुनां नित्य याना तये फइ मखु ।

वं थथे धाइ, ‘आःया लखौं दँ लिपा कल्पया विनाश जुइ । थ्व लोक नष्ट जुइ । महासमुद्र नं गनावनी । पृथ्वी पर्वतराज सुमेरु नं च्याइ । विनाश जुइ । ब्रम्हलोक तकं विनाश जुइ । उकिं मैत्री भावना या । करुणा, मुदिता व उपेक्षाया भावना या ।’थुगु खँ न्यनाः आपालं मनूतय् संवेग ब्वलनी । द्यःपिं नाप नापं मनूत नं मृदुचित्त जुइ । मैत्रीभाव याइ ।

पुण्य प्राप्त यानाः देवलोकय् जन्म काः वनी । अन ध्यान प्राप्त याइ । थुकथं दीर्घकाल फुइ । पृथ्वीइ हानं मेम्ह सुद्र्यः लुया वइ । थुगु इलय् छम्ह सुद्र्यः दुबी, हानं मेम्ह मेम्ह सुद्र्यः लुया वइ । चा व न्हि छगू थें जुइ । संसार छचालं सुद्र्यःया सन्ताप जुइ । साधारण सुद्र्यः सर्गतय् दइबलय् सुपाँय् दइ । तर कल्प विनाश याइगु सुद्र्यः लुइबलय् सुपाँय् दइ मखु ।

कुँ दइ मखु । आकाश मण्डल छगुलिं निर्मल आकाश जुइ । थुगु इलय् खुसि सुना वनी ।थुकथं हानं स्वम्हम्ह सुद्र्यः लुयावइ । थुकिया कारणं हिमालयय् खुसित नं सुना वनी । थनं कालान्तर लिपा प्यम्हम्ह सुद्र्यः लुया वइ । थुगु इलय् हिमालयपाखें दइगु ततःधंगु खुसित सुनावनी । थुगु इलय् सिंहप्रतापन, हंसप्रतापन, कर्णमुण्डल, कुनाल ह्रद, नांया थुगु न्हय्गू महासरोवर सुनावनी ।

थनं दीर्घकाल लिपा न्याम्हम्ह सुद्र्यः लुया वइ । थुगु इलय् महासमुद्र नं सुना वनी । महासमुद्रय् पतिं प्याकेत तकं लः दइ मखु । थुकिया दीर्घकाल लिपा हाकनं खुम्हम्ह सुद्र्यः लुया वइ । थुगु इलय् छचालं कुँया कुँ जक जुइ । थुकिं यानाः गुलित तरल दुगु खः, दक्व सुना वनी । थुकिं लिपा नं हानं न्हय्म्हम्ह सुद्र्यः लुइ ।

थुकिं यानाः सारा ब्रम्हाण्ड ज्वाला थी । सयौं योजन दुगु सुमेरुया च्वका टुक्रा टुक्रा जुइ । आकाश हे अन्तध्र्यान जुइ । थुकिया ज्वालां चातुर्महाराजिक देवलोक तकं च्याकी । अन च्वंगु कनक विमान, रत्नविमान, मणिविमान प्रभाव प्रथमध्यानभूमि तकं थ्यनी । अनया स्वंगूगु देवलोकयात च्याकी । थुकिं यानाः छचालं महान्धकार जुइ ।

थुगु सकतां खँ आचार्य बुद्धधोषकृत विशुद्धिमार्ग सफुली न्ह्यथनातःगु दु । थुकी अग्निपाखें जुइगु प्रलय क्यनातःगु दु । थुगु खँ अध्ययन यायेगु इलय् विश्वास याये फइ मखु ला थें च्वं । थथे नं जुइ ला धइथें च्वं । तर म्हिगःया ई व थौंया ईया दथुइ आपालं हिउपाः वयेधुंकूगु खँ झीसं खं । म्हिगः चांन्हि मदिकं न्ह्यानाच्वंगु गाःहिति व ल्वहंहिति थौं सुना वनेधुंकल ।

म्हिगःया बुंगाःचा हिति थौं माथंवंगु बुँ व छेँ जुया बीधुंकल । मनू चुइके यंकीगु खुसिइ लः खने मदयेधुंकल । हलिंन्यंकंया लकस असन्तुलित जुइधुंकल । उकिं हलिंन्यंकं ग्लोबल वार्मिङया चर्चा जुयाच्वंगु दु । इलय् ब्यलय् थाय्थासय् प्रलय जू । थुगु इलय् छकःसां झीसं संवेग ब्वलंकी । मैत्री, करुणा, मुदिता व अपेक्षाया भाव तइ । छुं ईया लागिं अनित्य वाःचायेकी ।

तर थुकिया आयु ताःहाकः याना यंकी मखु । थन अनित्य मात्र प्राणी व वस्तु जक मखु । संसार हे अनित्य धइगु खँ बोध याकी । थुलिं निन्हु प्यन्हुया लागिं जुइ । गुलिं छुं दँया लागिं । लखौं लख कल्पकल्प हे छाय् मजुइमा छन्हु सकतां वनी । ब्रम्हाण्ड नापं संसार नं तनावनी । थुकियात सुनां पने फइ मखु । सुनां नित्य याना तये फइ मखु ।

सम्बन्धित बुखँ

LEAVE YOUR COMMENTS