थिमिइ काय व कलाःयात स्यानाः आत्महत्या !

थिमि – मध्यपुर थिमि नगरपालिकाया वडा नं. ६ कुन्डोलया छखा छेँय् शुक्रवाः स्वम्ह सीपिं लुइकूगुलि उपिं मध्ये निम्हेसित स्यानाः छम्हेस्यां आत्महत्या याःगु प्रहरीया प्रारम्भिक अनुसन्धानं खनेदुगु दु । सीपिं छगू हे परिवारया अबु, मां व काय् खः । परिवारया सीम्ह लिसें छेँय् लहिनातःम्ह खिचा छम्ह सीगु अवस्थाय् लुइकूगु खः ।

प्रारम्भिक अनुसन्धान कथं अबुम्हेस्यां हे न्हापां काय व कलाःयात स्यानाः थःम्हं आत्महत्या याःगु खनेदुगु प्रहरीया धापुु दु । सीपिनि अवस्था स्वयाः थज्याःगु अनुमान याःगु खः ।

अबुम्ह ३६ दँया सुदीप अधिकारीं न्हापां झिंन्यादँ दुम्ह काय सुशान्त अधिकारी व कलाः सम्झानायात पाः थेंज्याःगु हतियारं पालाः स्यायेधुंकाः लिपा थःम्हं आत्महत्या याःगु खनेदुगु खँ प्रहरीं धाःगु दु ।

सीपिं सकसियां फोन वंगु सोमवाः निसें बन्द जुयाच्वंगु खः । उपिं मध्ये मांम्ह व कायम्हेसिया सीम्ह न्ववयाः ध्वग्गिना वनीथे च्वनेधुंकूगु दुसा अबुम्हेसिया सीम्ह धाःसा अपाय्सकं छुं जूगु खनेमदुनिगु खः । सीम्ह स्वयेबलय् मां व काय सीगु प्यन्हु न्यान्हु दयेधुंकूगु व अबुम्ह सीगु निन्हुति जक दुगु खनेदुगु खः । अथेहे मां व कायम्हेसित छ्यनय् व गपतय् हतियारं पालातःगु खनेदुसा अबुम्हसिया सीम्हय् धाःसा अज्याःगु घाः छुं नं खनेमदु । बरु सीम्ह लिक्क बान्ता यानातःगु खनेदु । अथे जूगुलिं नं अबुम्हेस्यां मां व काययात स्यानाः थःम्ह विष नयाः आत्महत्या याःगु खनेदुगु खँ अनुसन्धानय् सहभागी छम्ह प्रहरीं धाःगु दु । अबुम्ह सुदीप छुं ई न्ह्यव निसें मानसिक तनावय् नं दुगु खँ सीदुगु दु ।

प्यतँ जाःगु छेँय् निगूगु, स्वंगूगु व प्यंगूगु तलाय् छम्ह छम्हेसिया सीम्ह लुइकूगु खः । निगूगु तँय् छम्ह खिचा नं सीनाच्वंगु लुइकूगु खः । छेँय् गनं नं खापाय् चुकु तयामतःगु व तिना जक तःगु खः ।

सुदीपया किजा सुनिल अधिकारी शुक्रवाः सनिलय् पाखे दाजुम्हेसिया छेँय् वंबलय् दकलय् न्हापां सीपिं खंकूगु खः । सुनिलया कथं मू लुखा चालाच्वंगु हे खःसा थः थहां वनाबलय् निगूगु तँय् स्वाहानेया प्यासेजय् खिचा सिनाच्वंगु व नापसं च्वंगु क्वथाय् मांम्ह लासाय् सीनाच्वंगु, अन च्वय्या तल्लाय् कायम्ह नं लासाय् हे सीनाच्वंगु व अनं च्वय् भुतू क्वथाय् बँय् हे अबुम्ह सीनाच्वंगु खंगु खः । थ्व लिपा महानगरीय प्रहरी वृत्त थिमिइ खबर यायेवं प्रहरी अन वनाः अनुसन्धान सुरु याःगु खः ।

हत्या लिपा सम्झनायात अंगःपाखे स्वकाः म्हय् सिलखं त्वपुयातःगु खःसा कायम्हेसिया सीम्ह नं क्वप्सापुइकाः रामनामी म्हासुगु कापतं त्वपुयातःगु खः । मां व कायम्हेसिया सीम्ह दुथाय् अंगः, खाताय् हि लानाच्वंगु खः ।

महानगरीय अपराध महाशाखाया वरिष्ठ प्रहरी उपरीक्षक सहकुल थापां सीम्ह स्वम्हेसियां पोष्टमार्तम रिपोर्ट व खिचाया नं पोष्टमार्टम रिपोर्ट वल धायेवं जक घटनाया बारे थप खँ धायेफइगु जानकारी बियादीगु दु । वय्कलं धयादीगु दु, ‘सम्झना व सुशान्तया छ्यनय् तःकूगु घाः दु । सुशान्तया सीम्ह लानाच्वंगु खाताय् हि किनाच्वंगु ला तायेगु नँया चुप्पी नं लुइकागु दु । मां कायया सीम्ह नवयेधुंकूगु व घालय् कि दायेधुंकूगु दुसा सुदीपया सीम्ह न नं मवःनि, ध्व नं ध्वमगिनी । सुदीपया सीम्ह लिक्क दुगु देमाय् बान्ता यानातःगु दुसा खिचां नं बान्ता यानातःगु दु । भुतुली तरकारी व जा दु । उकिं प्रारम्भिक अनुसन्धानय् सुदीप व खिचा विष नयाः सीगु खनेदु । छेँया लुखा चालाच्वंगुलिं पिनेयापिं मनूत वयाः स्याःगु खः ला धयागु आशंका यायेथाय् दु, तर घटना स्थल व अवस्था स्वयेबलय् पिनेयापिं हे दुहां वयाः स्याःगु धकाः यकिन यानाः धायेफइगु अवस्था मदु ।’

स्थानीय मनूतय्सं नं प्यन्हु न्ह्यः उमिसं किराना पसः चायेकूगु व न्हिनय् पसः बन्द याना वंगु व निषेधाज्ञाया कारणं उपिं पिहां वः मवः धयागु याद मदुगु खँ धाःगु दु ।