थनिंनिसें विश्व फुटबलया महाकुम्भ मेला
एजे न्सी – थनिंनिसें विश्व फुटबलया महाकुम्भ मेला ‘फिफा विश्वकप फुटबल-२०२६’ शुरु जूवनाच्वंगु दु । विश्व फुटबलया इतिहासय् दकलय् तःधंगु व भव्य २३ गूगु संस्करणया फिफा विश्वकप फुटबल उत्तर अमेरिकाया स्वंगू देय्या मंकाः ग्वसालय् जुइत्यंगु दु ।
विश्व फुटबलया थ्व महाकुम्भ मेला थौं शुरु जुइगु खःसां कासा धाःसा कन्हसंनिसें जक शुरु जुइ । ई व दिंया ल्याखं कासाया औपचारिक उलेज्या थौं जुइगु खःसां कासा धाःसा कन्हय्निसं जुइ । विश्वकप फुटबलया उलेज्या मेक्सिको सिटीया ‘एज्टेका रंगशाला’ नेपाःया ईकथं थौं बहनि ११ः३० ताः इलय् न्ह्याइ । वयां लिपा थ्व हे रंगशालाय् मेक्सिको व दक्षिण अफ्रिका दथुइ विहीवाः चान्हसिया १ ताः इलय् जुइ ।
थुुगुसीया विश्वकप फुटबल थीथी कारणं कीर्तिमानी नं जुइ । ग्वसाः देय्या ल्याखं, सहभागि टिम (देय्)या ल्याखं, आपालं कासा जुइगु ल्याखं, ग्वसाः देय्या ल्याखं नं कीर्तिमानी जुइगुलिं थुगु विश्वकप अझ विशेष जुइगु जूगु दु । अःपुक धाये गु खःसा थुगुसीया विश्वकप आपालं खँय् न्हापांखुसी जुइत्यंगु दु । गुकिं यानाः थुगुसीया विश्वकपयात अझ विशेष याना यानाबी ।
अमेरिका, मेक्सिको व क्यानाडा स्वंगू देय्या मंकाः ग्वसालय् जुइगु विश्वकपया उलेज्या नं स्वंगुलिं देशय् स्वंगू हे बिस्कं तरिकां जुइ । विश्वकपया उलेज्या दकलय् न्हापां मेक्सिकोया एज्टेका रंगशालाय् जुन ११ तारिखय् जुइ । मेगु उलेज्या ज्याझ्वः जुन १२ य् क्यानाडाया टोरन्टो स्थित ‘बीएमओ फिल्ड’ व संयुक्त राज्य अमेरिकाया क्यालिफोर्नियाया ‘सो फीस्टेडियम’य् जुइ । क्यानाडाया रंगशालाय् न्हापांगु कासा क्यानाडा व बोस्निया हर्जगोभिना दथुइ व अमेरिकाया रंगशालाय् अमेरिका व पाराग्वे दथुइ कासा जुइ ।
मेक्सिकोया रंगशालां शुरु जुइगु विश्वकप फुटबलया महाकुम्भ मेला ३९ न्हु तक न्ह्याइ । जुन ११ य् मेक्सिकोया रंगशाला न्ह्याइगु विश्वकप जुलाई १९ य् अमेरिकाया न्यूयोर्कय् जुइगु फाइनल कासालिसें क्वचाइ । थुगुसीया विश्वकपय् आतकमध्ये दकलय् अप्वः १०४ गू कासा जुइ । थुकी समूह चरणय् ७२ गू व नकआउटय् ३२ गू कासा जुइ ।
फिफा विश्वकपया इतिहासय् न्हापांखुसी स्वंगू देय्या मंकाः ग्वसालय् जुइगु विश्वकप १६ गू रंगशालाय् कासा जुइ । अमेरि काया ११ गू, मेक्सिकोया स्वंगू व क्यानाडाया निगू रंगशालाय् कासा जुइ । थ्व स्वयां न्ह्यःया संस्करणतक ३२ गू देशं ब्वति कया वयाच्वंगुलिइ थुगुसी न्हापांखुसी ४८ गू देशं ब्वति कयाच्वंगु दु । थुपिं टोलीयात प्रत्येक छगू पुचलय् प्यंगू टोली दुथ्याकाः झिंनिगू पुचः ‘ए’ निसें ‘एल’ तक ब्वथलातःगु दु ।
समूह चरणय् शीर्ष निगू थासय् वयेत ताःलाःपिं स्वतः नकआउट चरणय् दुहां वनीसा स्वंगूगु थासय् वःगु उत्कृष्ट च्यागू टोली नं ‘ राउण्ड अफ ३२’ य् दुहां वनी । नकआउट चरणय् ‘राउण्ड अफ ३२’ थुगुसीनिसें थप जूगु न्हूगु चरण खः ।
मेक्सिकोय् स्वक्वःखुसी विश्वकप जुइत्यंगु दु । लिसें मेक्सिको स्वक्वःतक विश्वकप ग्वसाः ग्वःगु विश्वया छगू जक व न्हापांगु देय् जूवनाच्वंगु दुसा मेक्सिको व दक्षिण अफ्रिका दथुइ थुगु विश्वकपया हे न्हापांगु कासा जुइगु ‘एज्टेका स्टेडियम’ नं स्वंगू बिस्कं बिस्कं विश्वकप कासा जुइगु विश्वया न्हापांगु रंगशाला जुइ । थुगु रंगशालाय् सन् १९७०, १९८६ व २०२६ या कासा जुइगु विश्वया न्हापांगु व छगू जक रंगशालाया कीर्तिमान च्वनीगु जुइ ।
समूह चरणया कासा जुन ११ निसें जुन २७ तक जुइ । राउण्ड अफ ३२या कासा जुन २८ निसें जुलाई ३, राउण्ड अफ सिक्सटिनया कासा जुलाई ४ निसें ७ तक व क्वार्टर फाइनल कासा जुलाई ९ निसें ११ तक जुइ । सेमीफाइनल जुलाई १४ व १५ य् स्वंगूगु थाय्या निंतिं जुलाई १८ व फाइनल जुलाई १० तारिखय् जुइ ।
राउण्ड अफ ३२ य् समूह चरणपाखें छनोट जुया वःगु ३२ गू टो ली (प्रत्येक समूहपाखें शीर्ष निगू व स्वंगूगु थासय् वःगु उत्कृष्ट च्यागू) दथुइ नकआउट कासा जुइ । राउण्ड अफ १६ य् राउण्ड अफ ३२ या उत्कृष्ट (विजेता) टोली दथुइ प्रि-क्वार्टर फाइनल जुइ । थुगु चरणया विजयी टोली क्वार्टर फाइनलय् दुहांवनी । क्वार्टर फाइनलया कासा अमेरिकाया लस एन्जलस, कन्सास सिटी मियामि व बोस्टर सहरया रंगशालाय् जुइ । सेमीफाइनल अमेरिकाया डलास व एट्लान्टाय्, स्वंगूगु थासय्या निंतिं अमेरिकाया मियामिइ व फाइनल कासा न्यूयोर्कया मेटलाइफ स्टेडियमय् जुइ । थ्व रंगशालाया दर्शक क्षमता ८२,५०० खः ।
साविकया विजेता अर्जेन्टिना लियोनल मेस्सीया कप्तानीइ उपाधि रक्षा यायेगु लक्ष्य ज्वनाः मैदानय् कुहां वइगु जूगु दुसा कुराकाओ, उज्वेकिस्तान, जोर्डन व केप भेर्डें थ्व हे संस्करणपाखें विश्वकपय् डेब्यू याइ ।
LEAVE YOUR COMMENTS