मनाङ्ग लिगय् न्हूगु रेकर्ड तयेगु पाखे

येँ – न्हय्क्वः तकया लिग च्याम्पियन व थौंकन्हय्या डिफेन्डिङ्ग च्याम्पियन मनाङ्ग मस्र्यांङ्गदी क्लब जारी ए डिभिजन लिगय् छगू हे कासाय् पराजित मजुसे न्हूगु कीर्तिमान तयेगु लँपुइ न्ह्याः वनाच्वंगु दु । जारी लिगय् झिगू कासा तक छगलिइ नं पराजित मजूनिगु मनाङ्ग ल्यं दनिगु स्वंगू कासा नं त्याकेफत धाःसा ६४ वर्ष लिपा लिगय् न्हूगु इतिहास कायम याइगु जुइ ।

मनाङ्गया प्रशिक्षक सुमन श्रेष्ठं धयादीगु दु, ‘उपाधि लगभग सुरक्षित जुइधुंकूगु दु, तर आः जिमिगु लक्ष्य उपाधी जक मखु, लिगय् ल्यं दुगु स्वंगू कासा नं त्याकाः न्हूगु कीर्तिमान कायम यायेगु खः । जिपिं छुं नं कासाय् पराजित वा बराबरी मजुसे फुक्कं त्याकाः न्हूगु कीर्तिमान तये चाहे जुयाच्वनागु दु । ’

‘जिं जिमि कासामिपिंत विश्वास याना, कासामितय्सं नुगः क्वसायेकाः म्हिताच्वंगु दु’ प्रशिक्षक श्रेष्ठं धयादीगु दु, ‘कासामितय् हे कारणं जिपिं थन तक थ्यंगु खः । कासामि, अफिसयल सकलें उपाधी त्याकेगु जक मखु, फुक्कं कासा त्याकाः कीर्तिमान दयेके चाहे जुयाच्वंगु दु ।’
मनाङ्गं आः ११ औं चरणय् संकटा, १२ औं चरणय् हिमालयन शेर्पा व १३ औं चरणय् फ्रेन्डस क्लबलिसे म्हिती । संकटा बाहेक मेगु निगुलिं क्लब तुलनात्मक रुपं कमजोर टिम खः ।

लिगया इतिहासय् छगू कासा मबुसे लिग त्याकूगु इ तिहास दुसां लगातार झिगू कासा त्याकूगु रेकर्ड धाःसा अझं मदुनिगु खँ धाःगु दु । ‘नेपालय् लिग फुटबल सुरु जूगु थ्यंमथ्यं ६४ दँ दयेधुंकल, तर थ्व दथुइ झिगू कासा त्याकूगु क्लब धाःसा आःतक छुं लूगु मदुनि’ लिग निर्देशक सञ्जीव मिश्रं धाःगु दु । वय्कलं धयादीगु दु, ‘फुटबल क्षेत्रय् जि लगे जुयागु ३०–३५ दँ दयेधुंकल, तर थुकथं झिगू कासा लगातार धाःसा सुनां त्याकूगु जिं मसिउ ।’