थुगुसीया विश्वकपया स्तब्धपूर्ण लिच्वः, साउदी अरेबियां अर्जेन्टिनायात बुकल

एजेन्सी- थुगुसीया विश्वकपया न्हापांगु स्तब्धपूर्ण लिच्वः कथं साउदी अरेबियां अर्जेन्टिनायात बुकूगु दु । मंगलवाः जूगु न्हापांगु कासाय् साउदीं अर्जेन्टिनायात २–१ गोलं बुकूगु खः ।

थुगुसीया विश्वकपया हे प्रवल दावेदार अर्जेन्टिना पराजय तसकं अप्रत्यासित लिच्वः कथं वःगु दु । अर्जेन्टिना विश्वकप फुटबलय् न्हापांगु कासाय् थथे पराजित जूगु सन्१९९० लिपा न्हापांखुसी खः ।

अर्जेन्टिनां साउदीया पोस्टय् थ्वायेत ला प्यंगू गोल थ्वाःगु खः, तर थ्व गोल मध्ये स्वंगू अफसाइड जुलसा पेनाल्टि गोल छगू जक मान्यता जुल । कासाया झिगूगु मिनेटय् हे अर्जेन्टिनायात पेनाल्टिया ह्वःताः वःगु खःसा लियोनल मेसीं याउँक गोल यासें अर्जेन्टिनायात अग्रता बिउगु खः । तर बांलाक तालमेल मिले यायेमफुगु अर्जेन्टिनाविरुद्ध साउदी अरेबियाया ल्याय्म्हपिं कासामिपिंसं जुझारु कासा म्हितुसें पराजित यानाबिल ।

न्हापांगु हाफय् छगू गोलं लिउने लाःगु साउदीं निगूगु हाफ सुरु जूगु च्यागू मिनेट दुने निगू गोल याःगु खः । कासाया ४८ औं मिनेटय् अल सेहरीं गोल यासें कासा बराबरीइ हयाबिउगु खःसा थ्वयां न्यागू मिनेट लिपा हे कासाया ५३ औं मिनेटय् अल दाउसारीं गोल यासें सउदीयात विजयया लँपुइ यंकूगु खः । साउदीया गोलकिपर अल ओवासीं स्वंगू उत्कृष्ट बचाउ यानाबिउगुलिं नं अर्जेन्टिना कासाय् लिहां वयेमफुगु खः ।