प्राधिकरण व स्थानीय तह दथुइ पुनःनिर्माणय् सहकार्य मजू

यल- राष्ट्रिय पुनःनिर्माण प्राधिकरण व स्थानीय तह दथुइ तःभुखाचं क्षति जूगु संरचना पुनःनिर्माणया निंतिं आतकं समन्वय जुइ फयाच्वंगु मदुनि । तःभुखाचं क्षति जूगु सम्पदा, ब्वनेकुथि व स्वास्थ्य चौकी पुनःनिर्माणया निंतिं स्थानीय तहलिसें जुइमाःगु समन्वय आतकं जुइ मफयाच्वंगुलिं अज्याःगु संरचना पुनःनिर्माणं गति नं काये फयाच्वंगु मदु ।

२०७२ साल बैशाख १२ गते तःभुखाय् ब्वःगु इलय् स्थानीय तह जनप्रतिनिधिविहीन जुयाच्वंगु अवस्था खःसा आः स्थानीय तहय् निर्वाचित जनप्रतिनिधि वःगु दत्या दयेधुंकूगु अवस्थाय् नं प्राधिकरण व स्थानीय तह दथुइ सहकार्य जुइ फयाच्वंगु मदु । थुकिं यानाः सार्वजनिक सम्पत्तिया पुनःनिर्माणया जानकारीतकं स्थानीय तहं काये फयाच्वंगु मदु ।

इल जिल्लाय् लाःगु महालक्ष्मी नगरपालिका दुने थौंकन्हय् आपालं विद्यालय व स्वास्थ्य चौकी पुनःनिर्माण जुयाच्वंगु धाःसा दु, तर उकिया जानकारी स्थानीय तहयात मदु । पुनःनिर्माणय् समस्या जुल धाःसा जक थःपिंत जानकारी बीगु यानाच्वंगु नगरपालिका प्रमुख रामेश्वर श्रेष्ठं कनादिल । नगरपालिका क्षेत्रय् हे जुयाच्वंगु गुलिखे संरचना पुनःनिर्माणय् समस्या खने दयाच्वंगु दु ।

‘विद्यालयया नामय् जग्गा मदुसां करोडौं खर्च यानाः विद्यालय भवन दयेकाच्वंगु दु, तर चःबि धाःसा छगू नं मदु । थज्याःगु आधारभूत कमि कमजोर खंकखंक नं थःपिं धाःसा स्वया जक च्वनेमाःगु बाध्यता दु’ नगर प्रमुख श्रेष्ठं धयादिल ।

पुनःनिर्माणया निंतिं निगू निकाय दथुइ समन्वय मजूसां स्थानीयस्तरय् जुयाच्वंगु पुनःनिर्माणय् वइगु समस्या समाधान यायेत, सिफारिस यायेत व निर्माण सम्पन्न लिपा हस्तान्तरणया निंति. जक स्थानीय सरकारयात मालेगु ज्या जुयाच्वंगु दु ।