संसदय् नं ओलीयात कारवाहीया पौ

येँ – नेकपा दाहाल–नेपाल पुचलं प्रधानमन्त्री लिसें संसदीय दलया नेता केपी शर्मा ओली, उपनेता सुवास नेम्वाङ, सचेतक शान्ता चौधरीपिंत पदं चीकेधुनागु जानकारी संघीय संसद् सचिवालययात बिउगु दु ।

म्हिगः प्रमुच सचेतक देव गुरुङ सहितया नेतात संसद् सचिवालय सिंहदरबारय् वनाः संसदीय दलया नेता ओली, उपनेता नेम्वाङ, सचेतक चौधरीयात जिम्मेवारीपाखें मुक्त यानागु जानकारी याकूगु खः । थ्व स्वयां न्ह्यः प्रम ओलीं प्रमुख सचेतक देव गुरुङयात चीका वय्कःया थासय् विशाल भट्टराईयात नियुक्त याःगु खः ।

म्हिगः दाहाल–नेपाल पुचलं सचिवालययात छ्वःगु पतिइ प्रम ओलीयात पार्टी सदस्यपाखें चीके धुनागुलिं संसदीय दलया नेताया रुपय् प्रम ओलीं याइगु ज्यायात मान्यता मबीत इनाप यानातःगु दु । पतिइ धयातःगु दु, ‘संसद पार्टीया संसदीय दलया निर्णय कथं न्ह्याइगु जूगुलिं जिमिसं पार्र्टीइ जूगु हिलाबुलाया बारे संसद सचिवालययात जानकारी याकागु दु, प्रधानमन्त्री तथा संसदीय दलया नेता केपी शर्मा ओली, उपनेता सुवासचन्द्र नेम्वाङ लगायत मनूतय् बारे पार्टीं याःगु निर्णय जानकारी याकाच्वना ।’

‘बहुमत केन्द्रीय दुजःपिंसं ब्वति काःगु केन्द्रीय कमिटीया बैठकं प्रम ओलीयात पार्टी सदस्यपाखें चीकेधुनागुलिं संसदीय दलया नेता नं जुइ मफइगुलिं संसदीय दल व सम्बन्धित फुकसितं जानकारी याकाच्वना’ – पतिइ धयातःगु दु ।

नेकपा दाहाल–नेपाल पुचलं वंगु माघ १९ गते च्वंगु केन्द्रीय कमिटीया बैठकं प्रम ओलीयात आकस्मिक व असंवैधानिक रुपं प्रतिनिधिसभा विघटन यायेगु लिसें गम्भीर रुपं पार्टी अनुशासन उल्लंघन याःगु धासें पार्टी सदस्यतापाखें चीकेगु निर्णय याःगु खः ।

सम्बन्धित बुखँ

LEAVE YOUR COMMENTS