
ख्वप – नेपालभाषाया साहित्यकारलिसें चिबाखं च्वमि श्याम आशाया निगू सफू ‘बाः वःगु ख्वबि’ व ‘पिज्वये मफुगु सः’या चिखिफ्यनेगु ज्या जुल । याताजः नेपालभाषा साहित्य दबू, ख्वपया दुजः सौरभ शाक्यया सभापतित्वय् जूगु ज्याझ्वलय् मूपाहां वाङ्मय शताब्दी पुरुष सत्यमोहन जोशीं उगु सफू पितब्वज्या यानादीगु खः ।
ज्याझ्वलय् नवासें मूपाहां जोशीं मेमेगु साहित्य आपालं दयेधुंकूसां थौंया न्हू पुस्ता व मस्तय्गु निंतिं साहित्यया अभाव जूगु धासें आः इमिगु निंतिं साहित्य सिर्जना यायेत नेपालभाषा साहित्यकारपिंत इनाप यानादिल । यदि न्हू पुस्ताया निंतिं न्हूकथंया साहित्य सिर्जना यायेगु ज्या मजुल धाःसा संस्कृत भाय् थें नेपालभाषा नं सिना वनेफु धासें थुखेपाखें ध्यान बीत साहित्यकारतय्त सचेत यानादिल ।
पितब्वज्या जूगु चिबाखं सफूया समीक्षा यासें नांजाःम्ह समालोचक नर्मदेश्वर प्रधानं जीवनया थीथी पक्ष व छगू जक पक्षयात कःघानाः च्वयातःगु साहित्य उपन्यास व बाख जुइ धयादिल । रामशेखर लुमन्ति दबूया नायः गोविन्दमान श्रेष्ठं सरकारं आदिवासी जनजातिया भाय्प्रति अपनत्व मक्यंगु द्वपं बियादिल ।
नेपालभाषाया साहित्यकारलिसें च्वमिपिं तिलकप्रकाश कायस्थ, नरेन्द्रभक्त हाडापिंसं नं नवानादीगु ज्याझ्वलय् सफूया च्वमि श्याम आशां ‘श्याम–विश्व सिरपाः’या निंतिं न्यागू लाख तकाया अक्षयकोष नं स्वनादीगु खः ।
LEAVE YOUR COMMENTS