
येँ – टिकापुर हत्या काण्डय् जेलय् लानाच्वंपिं लक्ष्मण थारु व चुन्नीलाल चौधरीं पहिचानया आन्दोलन अझ च्वन्ह्याका यंकेमाःगु खँ धाःगु दु । नेपाः पार्टीया अध्यक्ष विजय सैंजु लिसे कारागारय् नापलायेगु झ्वलय् वय्कःपिंसं उगु खँ धाःगु खः ।थारु व चौधरीयात कैलालीया धनगढी उपमहानगरपालिकाय् च्वंगु जिल्ला कारागारय् निगू ब्लकय् अलग अलग हे कुनातःगु दु । टिकापुर घटनाय् संलग्न निम्ह मस्तय्त धाःसा पोखराय् च्वंगु बाल सुधार केन्द्रय् तयातःगु दु ।
थारु व अदालतं कि मखुसा अदालतं थःपिंत दोषी धायेमाल मखुसा थःपिंत रिहा यायेमाःगु माग यानाच्वंगु खँ अध्यक्ष सैंजुं नेपालभाषा टाइम्सयात कनादीगु दु । टिकापुर घटनाय् ज्वनातःपिंत अदालतं आः तक दोषी धाःगु मदुनि । थःपिं निर्दोष जूसां नं स्वदँ न्ह्यवंनिसें कुनाः सरकारं मानव अधिकार उल्लंघन यानाच्वंगु द्वपं वय्कःपिंसं बिउगु दु ।
मेखे सरकारं धाःसा थ्व घटनाय् अदालतं छुं निर्णय यात उकियात माने याये धायेगु यानाच्वंगु दु ।जेलय् लानाच्वंपिं थारु व चौधरीं थःपिं राजबन्दी जूगुलिं राजबन्दी कथं हे व्यवहार यायेमाःगु माग नं यानाच्वंगु दु ।थ्व झ्वलय् वय्कःपिं थःपिनिगु राष्ट्रिय जनता पार्टीया झिंन्हय्म्ह सांसदत संसदय् दुसां नं उमिसं नं थःपिनिगु बारे छुं यायेमफुगु द्वपं बियादीगु दु ।
‘झिंन्हय्म्ह सांसदं चाहे जुल धाःसा सदन अवरुद्ध यायेफइगु अवस्था दु, तर नेतातय्सं थुकी ध्यान तयाच्वंगु मदु’ धासें वय्कःपिंसं पार्टीं सरकारयात बियातःगु समर्थन लित कयाः आन्दोलनय् वनेमाःगु सुझाव बिउगु खँ अध्यक्ष संैजु कनादीगु दु । अथेहे वय्कःपिंसं चीचीधंगु पार्टी छगू थासय् च्वना आन्दोलन यायेमाःगु सुझाव नं बिउगु खःसा लिसलय् अध्यक्ष सैजुं थःपिंसं झिंछगू घटकया मोर्चाबन्दी दयेके धुनागु व मेगु चीधंगु पार्टी लिसें नं सहलह जुयाच्वंगु जानकारी वय्कःपिंत याकूगु खः ।
अध्यक्ष सैंजुयात वय्कःपिंसं टिकापुरया घटनाय् ज्वनाः कुनातःपिनि परिवार थौंकन्हय् आर्थिक रुपं संकटय् लानाच्वंगु जानकारी नं याकूगु खः । छेँया निंतिं कमे याइम्ह मू हामा हे जेलय् लानाच्वंगुलिं छेँजःपिनि आर्थिक स्थिति बांमलाना वनाच्वंगु खँ धाःगु खः ।
प्रदेश ३ संसदय् राजधानी विधेयक दर्ता मजुल
येँ – प्रदेश नम्बर ३ या संसद बैठक म्हिगः निसें न्ह्याःगु दु । बैठकय् थीथी न्यागू विधेयक दर्ता जूसां राजधानीयात कयाः धाःसा छुं विधेयक दर्ता मजूनिगु खँ धाःगु दु । सत्तारुढ नेकपा दुने हे प्रदेश राजधानीयात कयाः विवाद ब्वलनाच्वंगुलिं विधेयक दर्ता जुइमफयाच्वंगु खँ धाःगु । थ्व स्वयां न्ह्यः मुख्यमन्त्री डोरमणि पौडलं वइगु संसदया बैठकय् प्रदेशया राजधानी व नांयात कयाः विधेयक दर्ता जुइगु खँ धयादीगु खः ।
LEAVE YOUR COMMENTS