भारतया नकली वासः दुकाइगु देय् मध्ये नेपाः न्ह्यःने

येँ – भारतं थीथी देशय् निर्यात याइगु अधिकांश वासः गुणस्तरहीन जूगु खँ विश्व स्वास्थ्य संगठनं धाःगु दु । संगठनं छुं न्हि न्ह्यः पिथंगु रिपोर्ट कथं भारत विश्वय् हे दकलय् अप्वः गुणस्तरहीन वासः निर्यात याइगु देय् जुयाच्वंगु दु । रिपोर्टय् भारतं निर्यात याइगु वासः मध्ये १० प्रतिशत न्युनतम अन्तर्राष्ट्रिय मापदण्ड तकं पूमवंकूगु खँ न्ह्यथनातःगु दु । अथेहे भारतं निर्यात याइगु गुलिखे वासः नक्कली लानाच्वंगु दुसा गुलिं म्याद फुइधुंकूगु तकं लुइकूगु दु ।

भारतं निर्यात याइगु वासः मध्ये एन्टिबायोटिक्स, मचा मदइगु वासः, मुसुया वासः, स्याःगु क्वलाइगु थेंज्याःगु वासलय् अप्वः कैफियत लूगु खँ नं रिपोर्टय् न्ह्यथनातःगु दु । भारतं अज्याःगु वासः अप्वः यानाः म्हो आय दुगु देशय् निर्यात यायेगु यानाच्वंगु दु ।
भारतं निर्यात याइगु थज्याःगु वासः अप्वः यानाः एसिया, अफ्रिका व दक्षिण अमेरिकाय् छ्वयेगु यानाच्वंगु दु । अन भारतं मुक्कं निर्यातया ३० प्रतिशत वासः छ्वइ ।

नक्कली व मापदण्ड पूमवंगु वासः कमजोर सरकार, कमजोर प्रविधि व गुणस्तरीय वासः बारे मसिउगु कारणं अल्पविकसित व विकासोन्मुख राष्ट्रय् अप्वः वनाच्वंगु दु । भारतं छ्वइगु सिरप नांगु मुसु वइगु वासलं पाराग्वे व पाकिस्तानय् द्वलंद्वः मनूत विरामी जूगु तथ्य नं रिपोर्टय् न्ह्यथनातःगु दु । अज्याःगु वासलय् छ्यःगु मर्फिन माक्व स्वयां न्यादुगं अप्वः दुगु खँ धाःगु दु ।

रिपोर्टय् धयातः कथं नेपाः नं भारतपाखें दकलय् अप्वः वासः आयात याइगु देय् मध्ये छगू खः । विश्व स्वास्थ्य संगठनया कथं गरिब देय् नेपाः नं गुणस्तरहीन वासः आयात याइगु देय् जुयाच्वंगु दु । अझ भौगोलिक रुपं नं स्वाःगु जुयाः नेपालय् अज्याःगु नक्कली वासः अप्वः दुहां वइगु सम्भावना दु ।