कोरोना पनीगु इजरायली एप्स बारे नेपालय् सहलह

येँ – थौंकन्हय् इजरायलय् प्रचलित कोरोना संक्रमण पनेगु ज्याय् ग्वाहालि याइगु छगू एप्स नेपालय् नं छ्यलाबुलाय् हयेगु बारे स्वास्थ्य मन्त्रालयया अधिकारीतय्सं खँल्हाबल्हा न्ह्याकूगु दु । ‘सेफ प्लेस’ नांया उगु सफ्टवेयर एप्लिकेशनं संक्रमित मनू वंगु १४ न्हुया दुने गन गन वंगु दु धइगु थाय् ट्राय्क यासें वयागु सम्पर्कय् वःपिं सकलें सम्भावित मनूतय्त स्वापू तयाः तुरुन्त होम क्वारेन्टाइनय् च्वनेत वा डाक्टरया सल्लाह कायेत सुझाव बीगु याइ ।

थः कोरोना संक्रमित मनूया सम्पर्कय् वयेधुंकूगु जुयाच्वन धइगु खबर वयेसातकि हरेक मनू सतर्क जुइ व क्वारेन्टाइनय् च्वनेधुंकी, गुकिं यानाः वयापाखें हानं मेम्हेसित संक्रमण जुइ खनी मखु । इजरायलय् थ्वहे एप्स प्रयोग यानाः लकडाउन हे याये म्वायेक कोरोना संक्रमण नियन्त्रण यायेत सफलता चूलाःगु खँ धाःगु दु ।

इजरायलय् थ्व एप्सपाखें सफलतापूर्वक ज्या यानाच्वंगु खनाः इजरायलया लागिं नेपाली राजदूत डा. अञ्जान शाक्यं थुकिया बारे तुरुन्त हे नेपाःया स्वास्थ्य मन्त्रालययात जानकारी बिसें एप्स निर्माण याःगु इजरायली कम्पनी ‘केएलपी मामन’ लिसे स्वास्थ्य मन्त्रालयया पदाधिकारीलिसे खँल्हाबल्हा याकाः थ्व एप्स नेपाःयात उपयोगी जुइ–मजुइ धइगु बारे सहलह याकादीगु खः ।

राजदूत शाक्यया संयोजनय् जूगु थ्व सम्बन्धी भिडियो कन्फरेन्सय् केएलपी मामन कम्पनीया प्रतिनिधितय्सं एप्सं गय् यानाः ज्या याइ धकाः भिडियोपाखें हे डकुमेन्ट्री क्यनाः जानकारी बिउगु खः । भिडियो कन्फरेन्सय् नेपाःया स्वास्थ्य मन्त्रालयया प्रमुख विशेषज्ञ डा. दिपेन्द्ररमण सिंहया नेतृत्वय् थीथी पदाधिकारीतय्सं ब्वति काःगु खः ।

निर्माण कम्पनीं जानकारी बिउकथं थ्व एप्स आः इटाली, क्यानाडा, दुबई व मेक्सिकोय् प्रयोग याइगु जुयाच्वंगु दु ।

नेपालय् नं कोरोनाया प्रभाव खने दया वयेवं छुं ई न्ह्यः तिनि नेपाःया परराष्ट्र मन्त्री प्रदीप ज्ञवाली, श्रम रोजगार तथा सामाजिक सुरक्षा मन्त्री रामेश्वर यादव लगायतं इजरायली राजदूत डा. शाक्य लगायत विश्वया थीथी देशय् च्वंपिं नेपाली राजदूततलिसे भिडियो कन्फरेन्स यासें नेपाःया कोरोना अवस्था बारे जानकारी बीगु व अन देशय् च्वंपिं नेपाःमितय् अवस्था बारे जानकारी कायेगु ज्या याःगु खः ।

(ने. सं. ११४० चौलाथ्व ६/ वि. सं २०७६ चैत १७, साेमवाः)

सम्बन्धित बुखँ

LEAVE YOUR COMMENTS