हलिं नेवाः काभे्रया न्हापांगु दँमुँज्या

भ्वत(नेपालभाषा टाइम्स)- हलिं नेवाः गुथि काभ्रे जिल्लाया न्हापांगु दँमुँज्या वंगु शनिवाः जुल । काभ्रे जिल्लाया धौख्यः नगरपालिका वडा नं. १२ स्थित संखुइ उगु ज्याझ्वः जूगु खः । दँमुँज्या उलेज्या स्वयां न्ह्यः थीथी नेवाः झाँकी व परम्परागत नेवाः बाजंसहितं नगर परिक्रमा यासें अजिमा द्यःया देगः चाःहिला पुजा नं याःगु खः ।

धौख्यः नगरपालिकाया प्रमुख अशोक ब्याञ्जु श्रेष्ठं उलेज्या यानादीगु ज्याझ्वलय् गुथिया संरक्षक शान्तप्रकाश श्रेष्ठ, मू न्वकु सुरेश सैंजू, मूछ्याञ्जे अमरकाजी श्रेष्ठ, भाषा, लिपि कवःया कजि तीर्थभक्त स्याउला, शर्मिला श्रेष्ठं भिंतुना न्वचुलिसें नुगःखँ तयादीगु खः ।

थीथी ब्वनेकुथिया मस्तय्पाखें लाखे प्याखं, याकः मिसा हुला प्याखं, धिमे प्याखं नं न्ह्यःब्वःगु ज्याझ्वलय् गुथिया केन्द्रीय पदाधिकारी, दुजः, थीथी जिल्लाया कचा नायः, प्रतिनिधि गुथिया कृषि कवःया कजि कृष्णबहादुर श्रेष्ठ, सांगीतिक ज्याझ्वः कवःया कजि सुरेन्द्र श्रेष्ठलिसें आपालं स्थानीयतय् नं सहभागिता दुगु खः ।