स्वदँया दुने क्षतिग्रस्त सम्पदा पुनःनिर्माण यायेगु लक्ष्य

येँ – सरकारं वइगु स्वदँया दुने सम्पदा पुनःनिर्माणया ज्या क्वचायेकेगु महत्वकांक्षी लक्ष्य न्ह्यःने हःगु दु । अर्थमन्त्री डा. युवराज खतिवडां आः नकतिनि वइगु आर्थिक दँया निंतिं सार्वजनिक यानादीगु बजेटय् सरकारं वइगु स्वदँया दुने मरुसतः, रानीपुखू, धरहरा लगायत तःभुखाचं क्षति जूगु आपालं महत्वपूर्ण सम्पदा पुनःनिर्माण वइगु स्वदँया दुने क्वचायेकेगु अठोट याःगु दु ।

संघीय संसदय् वइगु आर्थिक दँया बजेट पेश यायेगु झ्वलय् वय्कलं उकथंया अठोट प्वंकादीगु खः । अर्थमन्त्री डा. खतिवडां किपुलिइ च्वंगु जातीय संग्रहालययात नेपाःया परम्परा, भाषा, संस्कृति, रीतिरिवाज, रहनसहन आदि पिज्वइकथया राष्ट्रिय सांस्कृतिक संग्रहालया रुपय् विकास याना यंकेगु नीति कयागु नं धयादीगु दु ।

अथे हे वय्कलं समान प्रकृतिया संग्रहालययात एकीकृत यानाः राष्ट्रिय संग्रहालयया रुपय् रुपान्तरण याना यंकेगु नं धयादीगु दु । लोपोन्मुख भाषा, धर्म, संस्कृतिया संरक्षण यायेगु व राष्ट्रिय सांस्कृतिक संग्रहालयया विकासया निंतिं पूर्वाधार विकास व निर्माणया निंतिं बजेटया व्यवस्था यानागु वय्कलं धयादीगु दु ।