मेलम्चीया लः इलय् हे येँय् वइ

येँ – खानेपानी मन्त्रालयं पीन्यान्हुया दुने येँय् मेलम्चीया लः हयेगु घोषणा याःगु दु । मेलम्ची खानेपानी आयोजना दयेकाच्वंगु इटालीया सीएमसी कम्पनीं थःपिं ताथ जूगु घोषणा यासें ज्या याये मफइगु धायेवं आः मेलम्चीया भविष्य छु जुइ धइगु अन्यौल ब्वलंगु खः । थ्व अन्यौलयात चीकेत मंगलवाः मन्त्रालयं छगू प्रेस विज्ञप्ति पिथनाः क्वःछिनातःगु इलय् हे मेलम्चीया लः हयेगु प्रतिवद्धता प्वंकूगु खः ।

मन्त्रालयं आःया ठेकेदार कम्पनी सीएमसीं ज्या मयाःगु अवस्थाय् नं विकल्प मालाः जूसां इलय् हे आयोजनाया ज्या क्वचायेकेगु दृढता प्वंकूगु दु ।

मन्त्रालयं मेलम्ची आयोजनाया ज्या ९० प्रतिशत पूवनेधुंकूगु, सुन्दरीजल तकया २७ किलोमिटर सुरुङमार्ग चायेधुंकूगु, सुरुङया ढलान व फिनिसिङया ज्या नं जुइधुंकूगु अवस्थाय् आः भेन्टिलेसन साफ्ट, हेड वक्र्स, अडिट टनेलया गेट, सेन्सर क्यामेरा जडान यायेगु ज्या जक ल्यं दुगुलिं गुगुं कथंया विशेष परिस्थिति ब्वलनीगु अवस्थाय् बाहेक मेगु अवस्थाय् आयोजना इलय् हे सम्पन्न जुइगु खँ नं स्पष्ट याःगु खः ।

मन्त्रालयं आयोजना दयेकेगु ज्या न्ह्यानाच्वंगु इलय् ठेकेदार कम्पनीया प्रमुख क्रिस्टियानो ग्रेको लगायतया पुचः अनुमति मकासें आयोजनास्थलं बिसिउँ वनाः नेपाः त्वःतेत्यंगुलिं उमिगु अवस्था बुझे यायेत गृह मन्त्रालययात इनाप यानागु व गृहं उमित निगरानी तयातःगु खँ धाःगु दु । मन्त्रालयं लिपांगु घटनां आयोजनाया ज्या प्रभावित मजुइगु खँ नं धाःगु दु ।

मन्त्रालयं सोमवाः व मंगलवाः न्हिछि धइथें मेलम्चीया सरोकारवाला पक्षलिसे सहलह यानाच्वंगु व परामर्शदाता कम्पनीयात छवाःया दुने मेलम्ची आयोजना सुरुङया प्राविधिक विश्लेषण सहितया प्रतिवेदन तयार यानाः पेश यायेत निर्देशन बिउगु दु । मन्त्रालयं खानेपानी मन्त्री बिना मगर मन्त्रालय वयेधुंकाः मेलम्चीया प्रगति द्रुतगतिं जुयाच्वंगु दावी नं याःगु दु ।

सम्बन्धित बुखँ

LEAVE YOUR COMMENTS