पुनर्गठनया लागिं प्रमयात दबाब

नेकपा स्थायी बैठकय् सरकारया आलोचना

येँ – नेपाल कम्युनिष्ट पार्टीया थन न्ह्यानाच्वंगु स्थायी समितिया बैठकय् सरकारं यानाच्वंगु ज्याखँया आलोचना जक जुयाच्वंगु मखु, आः वयाः सरकारय् च्वंपिं छुं छुं मन्त्रीत लिकयाः मन्त्रिमण्डलया हे पुनर्गठन यायेमाःगु समेत सः थ्वःगु दु । म्हिगः च्वंगु बैठकय् न्ववाःपिं स्थायी समिति दुजःतय्सं प्रधानमन्त्री समेत जुयादीम्ह पार्टीया अध्यक्ष केपी ओलीयात मन्त्रिमण्डल पुनर्गठन यानाः न्ह्याः वनेत दुजःतय्सं दबाब बिउगु खः ।

स्थायी समितिया दुजःपिं रघुजी पन्त व भीम आचार्यपिंसं म्हिगःया बैठकय् सरकारया छबी सुधार यायेगु लागिं नं छुं छुं मन्त्रीतय्त चीका हे छ्वयेमाःगु सुझाव बियादीगु खः । वय्कःपिंसं गुलि याकनं मन्त्रिमण्डल पुनर्गठन यात उलि हे याकनं सरकारया छबी नं बांलाइगु बिचाः नं तयादीगु खः ।

सरकारय् च्वंपिं मन्त्रीत गतिशील मजूगु व उमिसं जनताया ज्या नं बांलाक मयाःगु जुयाः प्रधानमन्त्री थम्हं हे उकिया समीक्षा यानाः ज्या मयाःपिं छुं मन्त्रीतय्त तुरुन्त हे चीका छ्वयेत इनाप यानादीगु खः ।न्ह्यानाच्वंगु स्थायी समिति बैठकय् प्रधानमन्त्री केपी ओलीया ज्या यायेगु शैलीयात कयाः नं तच्वःगु विरोध जुयाच्वंगु दु ।

वय्कलं सरकार चले यायेधुंकाः उखान टुक्का जक न्ववानाः जनताया हित जुइगु ज्या धाःसा छुं हे मयाः धकाः पार्टीया वरिष्ठ नेतातय्सं हे आलोचना यानाच्वंगु दु । सरकारय् अप्वः ध्यान बी माःगु जुयाः अध्यक्ष ओलीं पार्टीया ज्याय् ध्यान बी मखन धासें वरिष्ठ नेता वामदेव गौतमं आः पार्टीया जिम्मेवारी मेम्ह अध्यक्ष पुष्पकमल दाहालयात बीमाः धकाः लिखित प्रस्ताव हे तयादीगु खः ।

तर अध्यक्ष ओलीं उगु प्रस्तावयात अस्वीकार याःसां दाहालं धाःसा उकियात कयाः छुं प्रतिक्रिया बियादीगु मदुनि । पार्टीइ थुकथंया प्रस्तावत वयाच्वंगु जुयाः अन दुने सरकार वा पार्टीया समीकरण हीकेगु कथंया छुं तयारी जुयाच्वंगु अनुमान समेत याना हःगु दु ।

सम्बन्धित बुखँ

LEAVE YOUR COMMENTS