‘नक्कली डाक्टर’ धमाधम रिहा

येँ – वंगु छुं ई न्ह्यव नेपाल प्रहरीं छगू विशेष अपरेशन हे न्ह्याकाः देय्या थीथी अस्पतालय् ज्या यानाच्वंपिं नक्कली डाक्टरतय्त धमाधम ज्वनेगु ज्या यात । तर अबले ‘नक्कली’ धकाः ज्वंपिं आपालं डाक्टरत थौंकन्हय् अदालतपाखें सफाई कयाः हानं अस्पतालय् तुं ज्या याः वनेधुंकूगु दु । प्रहरीं ज्वंपिं नक्कली डाक्टरतय्त अदालतं छाय् अथे धमाधम सफाई बिया हल धइगु खँय् धाःसा मनूत अजूचायाच्वंगु दु ।
विज्ञ सूत्रतय्सं धाः कथं नक्कली धकाः ज्वंपिं थ्व डाक्टरतय्त अदालतं अथे तुरुन्त हे सफाई बियाहःगुया खास कारण उमिगु विरुद्ध दर्ता याःगु मुद्दा हे मिले मजूगुलिं जुयाच्वन ।

नकली धकाः ज्वंपिं डाक्टरतय्त सरकारं ‘ठगी’ धइगु द्वपं बियाः मुद्दा दर्ता यानातःगु दु । तर थ्व नकली डाक्टरतय्सं सुयातं ठगे यात धइगु खँ धाःसा अदालतय् प्रमाणित जुइ मफु । उकिं उमित अदालतं सफाई बियाः त्वःतकेगु ज्या यानाच्वंगु खः ।

नकली सर्टिफिकेट ज्वनाः डाक्टरी पेशा यानाच्वंपिं थ्व चिकित्सकतय् विरुद्ध दर्ता यायेमाःगु मुद्दा हे मिले मजूगु दावी सूत्रया दु । उमिसं याःगु अपराध छता व उमित बियातःगु द्वपं मेगु हे जूगु कारणं अदालतं उमित सफाई बिया हःगु खः ।

उमित ‘ठगी’ या द्वपं बियाः मुद्दा चले याःसां वास्तवय् ठगी जुइगु लागिं छु छु कसुर जुइमाः धकाः नेपाःया कानूनं किटान यानातःगु बुँदात उमिगु हकय् मिले मजूगु कारणं उमित अदालतं सजायँ बी मछिंगु खँ नं सूत्रं धाःगु दु ।

कानूनविद्तय्सं धाः कथं नेपाःया कानून कथं ‘थःके द हे मदुृगु ओहोदा तकं दु धया जुइगु व थःगु हक हे मथ्यीगु थासय् तकं हक दु धकाः व्यवहार यायेगु ज्या’ धकाः परिभाषित याना तःगु दु । थ्व बुँदा नक्कली सर्टिफिकेट कयाः डाक्टरी पेशा यानाच्वंपिं चिकित्सकतय्त लागू जुइ मखु । उमित धाथें बी माःगु द्वपं ला वास्तवय् ‘नक्कली प्रमाणपत्रया आधारय् चिकित्साया प्रमाणपत्र काःगु’ धइगु जुइमाःगु खः ।
तर सरकारी पक्षं उमिगु विरुद्ध मुद्दा दर्ता याइबलय् हे गलत आरोप बियाः दर्ता याइगु जुयाः अज्याःगु आरोप अदालतय् पुष्टि जुइ मफइगु स्वाभाविक हे जुल । गुकिं यानाः अदालतं उमित याउँक हे त्वःता छ्वया बी ।

सरकारी वकिलतय्सं आखिर छाय् थथे यानाः मुद्दा दर्ता याइ धइगु खँ धाःसा सी मदुनि । छुं सरकारी वकिलतय्सं थःथाय् छु छु प्रमाण ज्वनाः अभियुक्त न्ह्यःने तये हइगु खः वहे प्रमाणया आधारय् मुद्दा दर्ता यायेगु खः, मेगु थःपिंसं मसिउ धकाः लिसः बिउगु दु ।
वंगु वि.सं. २०७२ माघंनिसें २०७३ भदौ तकया दुने नेपाल प्रहरीं ‘अपरेशक क्वाक’ धइगु नामं देय्न्यंकंया थीथी अस्पतालय् ५८ म्ह नक्कली डाक्टरत ज्वनाः मुद्दा दर्ता याःगु खः । थुकी मध्ये अधिकांश डाक्टरत रिहा जुयाः हानं ज्याय् लिहां वनेधुंकूगु दुसा मेपिं नं याकनं हे रिहा जुइत्यंगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS