सरकारं फोहर व्यवस्थापनया निंतिं बोलपत्र आह्वान याइगु

येँ – सरकारं स्वनिगःया फोहर व्यवस्थापनया निंतिं बोलपत्र आह्वान यायेगु तयारी याःगु दु । सहरी विकास मन्त्रालयं थ्व हे वइगु फागुनया लिपांगु वाःतकया दुने दीर्घकालीन रुपं फोहर व्यवस्थापन यायेगु थाय् निर्माण यायेत बोलपत्र आह्वान यायेगु तयारी याःगु खः । मन्त्रालयया कथं वइगु बाःछिया दुने ज्या क्वचायेकथं निर्माणया निंतिं बोलपत्र आह्वान यायेगु तयारी याःगु दु ।

थौंकन्हय् निर्माणया निंतिं डिजाइन व चाया परीक्षण यायेगु ज्या जुयाच्वंगु दु । वइगु बाःछिया दुने ज्या क्वचायेकेगु ल्याखं निर्माणया निंतिं बोलपत्र आह्वान यायेगु मन्त्रालयया सूचना अधिकारी गणेश कर्माचार्यं कनादिल । थौंकन्हय् स्वनिगःया फोहर व्यवस्थापन यानाच्वंगु नुवाकोट जिल्लाया सिसडोलं करिब २ किलोमिटर तापाःगु थासय् हे दीर्घकालीन फोहर व्यवस्थापन स्थल निर्माण यायेत्यंगु खः ।

दीर्घकालीन फोहर व्यवस्थापनस्थल निर्माणया निंतिं मन्त्रालयं ३८ गू करोड तका दां विनियोजन याःगु दु । थ्व हे वंगु मंसिर १७ गते च्वंगु मन्त्रिपरिषद्या बैठकं सिसडोलं निगू किलोमिटर तापाःगु बञ्चरेडाँडाय् दीर्घकालीन फोहर व्यवस्थापन यायेगु नापं उगु थासय् करिब १५ मिटर तजाःगु बाँधलिसें मेमेगु आवश्यक पूर्वाधारसहित फोहर व्यवस्थापन स्थल निर्माण यायेगु भाला मन्त्रालययात बीगु निर्णय याःगु खः ।

वंगु मंगलवाः जक येँ महानगरपालिकाया वातावरण व्यवस्थापन समिति व विभागया पदाधिकारीं नं स्वनिगःया फोहर दीर्घकालीन रुपं व्यवस्थापन यायेगु थाय् बञ्चरेडाँडाय् जुयाच्वंगु अन्तिम व्यवस्थापन व निर्माणाधीन स्थलया अवस्थायात कयाः अवलोकन याःगु खः ।
येँ मनपाया प्रवक्ता ईश्वरमान डंगोलसहितया पुचलं बञ्चरे डाँडाया अवलोकन यासें फक्व याकनं पूर्वाधार निर्माणया ज्या क्वचायेकेत सम्बद्ध पक्षयात निर्देशन बिउगु खः ।

 

सम्बन्धित बुखँ

LEAVE YOUR COMMENTS