कला अनुसन्धान व वर्णन–लेखन तालिम
यल (नेपालभाषा टाइम्स)- अक्षेश्वर परम्परागत बुद्धिष्ट आर्ट कलेज व सम्पदा ‘दि हेरिटेज’या मंकाः ग्वसालय् निक्वःगु ‘कला अनुसन्धान तथा वर्णन–लेखन’ तालिम वंगु सोमवाः व मंगलवाः निन्हुयंक अक्षेश्वर महाविहारय् जुल । ज्याझ्वःया मूपाहां कथं झायादीम्ह राट्रिय अभिलेखालयया महानिर्देशक डा. सुरेश सुरज श्रेष्ठं झीगु नेपाःया सम्पदायात न्हापांनिसें थौंतक नं स्थानियपाखें हे संरक्षण व संवद्र्धन याना वयाच्वंगु खँ धयादिल ।
उचित नीति व चिउताः मदुगुलिं गुलिखे सम्पदा नष्ट जुया वनाच्वंगु दु धासें वय्कलं राष्ट्रिय अभिलेखालयय् अथें लानाच्वंगु गुलिखे अभिलेखया वैज्ञानिक अनुसन्धान यायेमानिगु खँ धयादिल । अथेहे नेपाःया सम्पदा विकास, संरक्षण व प्रवद्र्धनय् नेवाःतय्गु च्वन्ह्यागु शिल्पि, दक्षतायात सुनानं म्हो खंकेमज्यूगु खँ नेपाःया थ्यासपूmया डिजिटलाइजेसन याना वयाच्वनादीम्ह प्रा. डा. शंकर थापां कनादिल ।
अक्षेश्वर परम्परागत बुद्धिष्ट आर्ट कलेजया प्रिन्सिपल डा. नरेश शाक्यं नेवाः बौद्ध कलाकार व हस्तलिखित ग्रन्थपाखे विश्वय् बुद्धधर्म प्रचारप्रसार जूवंगु खँ कनादिल । अक्षेश्वर महाविहारया सचिव नापं लुम्विनी विकास कोषया सदस्य राजेश शाक्यं कलाकारतय्गु सृजनायात थुगु कलेजपाखें बजारीकरण यानायंकाः आयआर्जनया श्रोतया रुपय् प्रवद्र्धन यानायंकेगु खँय् भलसा बियादिल ।
ज्याझ्वलय् थज्यागु ज्यायात हानं हानं निरन्तरता बीफयेमा धयागुकथं लुम्बिनी विकास सद्भावना ग्रुपया दुजः विक्रम पाण्डें कलेजया संस्थापक रोशन बहादुर शाक्ययात नीन्याद्वः दां लःल्हानादीगु खः ।सम्पदा ‘दि हेरिटेज’या अध्यक्ष शोभानानी शाक्यया संयोजकत्वय् न्ह्याःगु ज्याझ्वलय् मुक्कंं झिंगुम्ह कलाकारतय्सं ब्बति काःगु खः । थुगु ज्याझ्वलय् संग्रहालयविद् नापं कला–वर्णन च्वमि उर्सुला मानन्धरं प्रशिक्षण बियादीगु खः ।
वय्कलं पौभाःया द्यःपिनिगु म्हसिका गुकथं सीकेगु, उमिगु आसन, मुद्रा, आभूषण, उकिया दार्शनिक महत्वनापं थःगु कलाया आधिकारिक प्रमाणिकरण गुकथं यायेगु धयागु खँय् प्रशिक्षण बियादीगु खः ।
LEAVE YOUR COMMENTS