न्हिनय् हे खू वइपिं स्मार्ट खुँ !

ख्वप – ख्वपय् थौंकन्हय् न्हिनय् हे गाडी ज्वनाः खू वइपिं न्हू कथंया खँुत खने दया वःगु दु । अज्याःपिं खुँतय्सं थनया छखा छेँनं ८८ केजी दुगु सेफ हे खुया यंकूगु दु । व नं तिन्हिनय् मनूतय्सं खंक खंक गाडीइ हे तयाः । खुँतय्सं उगु सेफ ज्वना वंगुयां ताः ई लिपा तिनि छेँथुवालं सिल कि थःगु छेँया सेफ ला गायब जुइधुंकल खनिं ।

सेफय् तयातःगु लुँ, दां व मेमेगु बहुमूल्य सामानया बारे आः तक छेँथुवालं छुं धाःगु मदुनि । थ्वहे झ्वलय् मंसीरया न्हापांगु वालय् ख्वप नगरपालिकाया उपमेयर रजनी जोशीया सिपाडोलय् च्वंगु छेँय् नं पजेरो गया वःपिं खुँतय्सं न्हिनय् हे नीस्वंगू लाख तका खुया यंकूगु खः ।

थुपिं अप्वः नगद छेँय् तये मदुगु वा सार्वजनिक पदय् च्वंपिनिगु सम्पत्ति विवरणय् निश्चित मापदण्ड उल्लेख यायेमाःगु कारणं जक उपमेयरपाखें उलि जक खुया यंकूगु धकाः सार्वजनिक याःगु हुइनाभुइना नं दु । अन व स्वयां कयौं गुणा अप्वः धनमाल खुया यंकूगु अनुमान याःगु दु ।

स्मार्ट जुयाः वयाच्वंपिं थ्व खुँतय्सं जगाति प्रहरी चौकी नापसं च्वंगु छखा छेँय् नं न्हिनय् हे खुया यंकूगु दु । स्थानीय लक्ष्मीसुन्दर लवजुया छेँय् उमिसं खुया यंकूगु खः । उगु छेँय् सामान खुयाः ल्ह्याच्वंगु दृश्य धाःसा सिसी क्यामेराय् कैद जुयाच्वंगु लानाच्वन । तर उगु फुटेज सहित प्रहरीइ उजुरी तःगु निला दयेधुंकलं नं आः तक प्रहरीं खुँ धाःसा पत्ता लगे याये फुगु मदुनि ।

थज्याःपिं खुँतय्सं न्हिनय् हे खुइगु क्रम कमलविनायकय् नं जूगु दु । तर प्रहरीं आः नकतिनि हे जक ख्वपं मोटरसाइकल खुइपिं छगू गिरोहयात ज्वने धुनागु सार्वजनिक याःगु दु । न्हिनय् खुइपिं स्मार्ट खुँतय्गु बारे धाःसा प्रहरीं छु यानाच्वंगु खः आः तक छुं खँ सार्वजनिक याःगु मदुनि ।