ने. सं. ११४४ कौलाथ्व पारू - नःलास्वनेगु

ओलीं हानं संसद विघटन यायेफु !

येँ – स्वक्वःखुसी प्रधानमन्त्रीया रुपय् म्हिगः शपथ ग्रहण यानादीम्ह केपी शर्मा ओलीं आः हाकनं संसद विघटन याये फइगु विश्लेषण विपक्षी खेमाया स्वंगू दलं याःगु दु । प्रधानमन्त्री ओलीं थ्वहे वइगु जेठ १५ गते न्ह्यः हे संसद विघटन याये फइगु विश्लेषण म्हिगः भुइजःसिइ कांग्रेस सभापति शेरबहादुर देउवाया छेँय् च्वंगु नेपाली कांग्रेस, माओवादी केन्द्र व जनता समाजवादी पार्टीया नेतातय् बैठकं याःगु खः ।

एमालेया वरिष्ठ नेता माधव नेपाल पुचलं प्रम ओलीयात हे समर्थन यायेधुंकाः ब्वलंगु लिपांगु राजनीतिक घटनाक्रम बारे समीक्षा यायेगु झ्वलय् स्वंगू विपक्षी दलया नेतातय् दथुइ उगु बैठक च्वंगु खः । बैठकं स्वंगू दल दथुया थ्व सहकार्ययात आः निरन्तरता बीगु निर्णय नं याःगु दु । बैठकय् कांग्रेस सभापति शेरबहादुर देउवा, माओवादी केन्द्रया अध्यक्ष पुष्पकमल दाहाल व जसपाया अध्यक्ष उपेन्द्र यादवं ब्वति काःगु खः ।

म्हिगःया बैठकय् प्रम ओलीं आः विश्वासया मत कायेगु निंतिं जेठया लिपांगु न्हि तक नं मपिसे जेठया न्हापांगु वालय् हे संसद अधिवेशन सःतेगु तयारी यानाच्वंगु बारे नं खँ जूगु खः । ओलीं जेठ १५ न्ह्यःहे विश्वासया मत फ्वनीगु व बहुमत मवल धाःसा संविधानया धारा ७६ (५) या व्यवस्था कथं संसद विघटनया अध्यादेश हये फइगु विश्लेषण नं बैठक जूगु खँ सूत्रं धाःगु दु ।

प्रम ओलीं आः थःके बहुमत दु धकाः क्यनेगु स्वयां नं बहुमत मवल धकाः संसद विघटन यासें मध्यावधि चुनावय् वने फइगु विश्लेषण नं विपक्षी नेतातय्सं याःगु दु । उगु बैठकं आः विपक्षी गठबन्धन क्वातुकेगु लागिं जसपाया महन्थ ठाकुर व राजेन्द्र महतोपिंलिसे नं सहलह ब्याकेगु निर्णय याःगु दु । म्हीग माधव नेपाल पुचलं ओलीयात समर्थन याइगु जुइवं ठाकुर व महतो निम्हं बहनीपाखे लैनचौरया भारतीय राजदूतावासय् दुहां वंगु खँ धाःगु दु ।

थ्वहे झ्वलय् ओलीं थःत साथ बिउवःपिं माधव नेपाल पुचःयात नं विश्वासया मत मकाःतले बैठक, वार्ता धकाः अलमल याइगु व विश्वासया मत कायेधुंकाः नेपाल पुचःया नं छगू हे माग पूरा मयासे मध्यावधि चुनावपाखे वनेगु तयारी यायेफु धइगु विश्लेषण नं राजनीतिक ख्यलय् जुयाच्वंगु दु ।

म्हिगःया बैठकय् स्वम्ह नेतातय् दथुइ लोकतन्त्र व संविधानया रक्षाया निंतिं सहकार्य जारी यानातयेगु निर्णय नं याःगु दु । उकथं हे बैठकय् विपक्षी गठबन्धनया बहुमत वयेफूगु मेगु कारण विदेशी चलखेल जिम्मेवारी दुगु निष्कर्ष नं पिकाःगु दु । बैठकया निर्णय कथं माधव नेपाल व महन्थ ठाकुर लिसे सम्वाद नं न्ह्याकेत सहमत जूगु दु ।