ओमानविरुद्ध नेपाःया शानदार विजय
येँ (नेपालभाषा टाइम्स)- एसिसी प्रिमियर लिगय् नेपालं झ्वःलाक निगूगु विजय चूलाकूगु दु । म्हिगः टियु मैदानय् जूगु कासाय् अलराउण्डर कुशल मल्लया विस्फोटक ब्याटिङया ग्वाहालिं नेपालं ओमानयात ८४ रनं बुकूगु खः ।
ओमान टस त्याकाः नेपाःयात न्हापां ब्याटिङ याकेबिउगु कासाय् मल्लया कीर्तिमानी शतकया ग्वाहालिं नेपालं ३१० रनया कीर्तिमानी योगफल दयेकूगु खः । नेपालं एकदिवसीय क्रिकेटय् दयेकूगु आःतकया थ्व दकलय् तःधंगु योगफल खः । नेपालं ५० ओभरय् ८ विकेटया क्षतिइ ३१० रन दयेकूगु खः । लिसलय् ब्याटिङ याःवःगु ओमान मुक्कं २२६ रन दयेकाः ४६.३ ओभरय् अलआउट जूगु खः ।
कीर्तिमानी योगफल दयेकेगु निंतिं मल्लं ६४ बलय् ९ चौका व १० छक्का थ्वानाः १०८ रनया ग्वाहालि याःगु खः । थ्व झ्वलय् मल्लं ५९ बलय् हे शतक पूवंकूगु खः । थःगु अन्तर्राष्ट्रिय करियरया हे न्हापांगु शतक थ्वायेगु झ्वलय् मल्लं दकलय् याकनं शतक थ्वाःगु रेकर्ड नं तःगु खः । थ्वयां न्ह्यः कप्तान रोहित पौडेलं ९१ बलय् शतक थ्वानाः कीर्तिमान तयातःगु खः । थुकिया लिसे मल्ल अन्र्तराष्ट्रिय एकदिवसीय कासाय् शतक थ्वाःम्ह नेपाःया खुम्हम्ह कासामि नं जूगु दु । मल्ल ४१ औं ओभरय् अकिब इलियासया प्यंगूगु बलय् आयन खानपाखें क्याच आउट जूगु खः ।
नेपाःया निंतिं सोमपाल कामि ६२ रनया अबिजित पारि म्हितल । ३९ बलय् अर्धसतक पूवंकूम्ह कामीं ४८ बलय् ९ चौका थ्वानाः ६३ रनया योगदान बिउगु खः ।
नेपाःया सुरुवात धाःसा बांमलाक जूगु खः । प्रारम्भिक ब्याट्सम्यान कुशल भुर्तेल स्वंगूगु ओभरया निगूगु बल थ्वायेगु झ्वलय् शून्य आउट जूगु खः । अथेहे आसिफ शेख नं प्यंगूगु ओभरया प्यंगूगु बलय् शून्य हे आउट जूगु खः ।
नेपालं न्हापांगु रन हे २८ औं बलय् तिनि दयेकेत ताःलाःगु खः । निम्हं प्रारम्भिक ब्याट्सम्यानत शून्यय् आउट जुइधुंकाः स्वंगूगु विकेटया निंतिं कप्तान रोहित पौडेल व भीम सार्किं ५४ रनया साझेदारी याःगु खः । रोहित ३४ बल म्हिताः २३ रन दयेकाः १८ औं ओभरय् आउट जूगु खःसा भीम सार्किं ३३ रन दयेकूबलय् २१ ओभरय् आउट जुल । नेपाःया निंतिं करण केसीं २९, आरिफ शेखं २९, दीपेन्द्र सिंह ऐरीं ७, सन्दीप लामिछानें ८ रनया योगदान बिउगु खः ।
ओमानया निंतिं मोहम्मद नदीमं दकलय् अप्वः ६५ रन दयेकूगु खःसा सन्दीप गौडं ४६ रनया योगदान याःगु खः । नेपाःया निंतिं सन्दीप लामिछाने व करण केसीं स्वंगू स्वंगू विकेट कालसा दीपेन्द्रसिंह ऐरीं निगू व ललितनारायण राजवंशीं छगू विकेट काःगु खः ।
शुक्रवाः हे जूगु मेगु कासाय् हंगकंगं युएईयात डिएलएस नियमं ६७ रनं बुकल । हंगकंग न्हापां ब्याटिङ यासें च्यागू विकेटया क्षतिइ २६३ रन दयेकूगु खः । लिसलय् युएई ब्याटिङ यानाच्वंगु इलय् द्यः खिउया वयेवं कासा २७ ओभर थ्यंबलय् दिकेमाःगु खः । थ्व इलय् तक युएई ६ विकेटया क्षतिइ ११७ रन दयेकूगु खः । द्यः खिउँया कासा दिकेमाःगु जुइवं डिएलएस नियमं ल्याःचाः यानाः ६७ रनं युएइ बूगु घोषणा याःगु खः ।
हंगकंगया निंतिं एन्से राथं १०६ रनया शतकीय पारी म्हितूगु खःसा कप्तान निजाकत खानं २२, बाबर हयातं ५, किन्चित शाहं ३५, एजाज खानं २७, यासिम मुर्तजां ३, हारुन अर्सदं ८, इसान खानं २३, आयुष शुक्लां १० रन दयेकूगु खः ।
युएईया निंतिं आर्यन लार्कां दकलय् अप्वः ५२ रन दयेकलसा रमिस शाहजादं ३४, कप्तान मुहम्मद वसिमं, भिर्टिया अरबिन्दं ७, रोहन मुस्तफां ४ व आसिफ खानं १ रनया योगदान बिउगु खः ।
LEAVE YOUR COMMENTS