ने. सं. ११४४ कौलाथ्व तृतीया -

पार्किन्सन ः लक्षण, कारण व प्राकृतिक उपचार

पार्किन्सन म्ह –ल्हाःतुति) खाइगु छताजि न्ह्यपुया ल्वय् ः, गुगु ताःई तक न्ह्यपुइ ब्वलनाच्वनीगु खः । थ्व ल्वय्या प्रभाव बुलुहुं बुलुहुं जक खने दयावइ । सिइके हे फइमखु कि गबलय् थुकिया लक्षण सुरु जुल खः । लां लां लिपा लक्षणया तीब्रता अप्वयावल कि तिनि झीत महसुस जुयावइ कि पक्का नं छुं गडबड ला जूगु हे दु ।

थ्व ल्वय् सुं मनूयात जुलकि व ल्वगि मनूया ल्हाःतुति थरथर खानावइ । गबलें गबलें थुगु ल्वय्या लक्षण कम जुयाः लनावनी । थ्व ल्वय् जूपिं गुलिं गुलिं मनूतय्त ल्हाःतुति खाइगु मजुइ नं फु, तर गबलय् वं च्वयेगु ज्या यायेत स्वइ, अबलय् च्वयेगु ज्या याये मफयाबी । बलं बलं च्वल हे धाःसां आखः बेबेक्वयावनी ।

ल्वगि मनूया ल्हातं छुं पदार्थ ज्वने व ल्ह्वने नं थाकुयावइ । थ्व ल्वय्या ल्वगिया वाकुधी, म्ये व मिखा नं गबलें गबलें थरथर खानावइ ।
अप्वः थें ल्वगितय् खाइगु न्हापां कम जुइ, भचा भचा जुइ, दिनाः दिनाः जुइ । लिपा जूलिसे थ्व ताउत जुयाच्वनी । अले मेमेगु अंगलय् नं न्यनावनी ।

अप्वः थें छखेर (देपाय् वा जवय्) जुइ, तर गुलिं गुलिं ल्वगितय्त लिपा जूलिसे निखेरं जुयावइ । थ्व ल्वय् बुलुहुं बुलुहुं तच्वयावलकि ल्वगिया थीथी मांसपेशी छानावइ । म्ह कक्रक च्वनी, तुतिइ नं कथिं दाः थें जुइ । म्ह झ्यातु थें जुइ ।

लक्षण
१) मिखा तग्वयेक कनाच्वनी, थय्क स्वयेबलय् वं सुयातं नये थें स्वयाच्वं थें खनेदइ ।

२) ख्वालय् भावशून्य खनेदइ । खँ ल्हायेबलय् ख्वालय् खने दयावइगु अनेतने भाव व मुद्रा –गथेकि ः न्हिलेगु, तं चायेगु, ख्वाः खिउँकेगु, ग्यायेगु आदि) प्रकट जुइमखु । अथवा कम जक खनेदइ ।

३) नयेबलय् सास्ति जुइ । नसा घुतुकेत ताउ माली । कथुइ थाइ । थरथर खानाः गिलास वा कपय् च्वंगु वाइ ।

४) ल्हातं काःगु प्यय् कुतुं वनी । म्हुतुं लाः अप्वः पिहां वइ । याकनं याकनं न्ह्यये फइमखु । मुसु वइ, ह्वपुइ ।

५) सः चिसः जुइ, अले थरथर खाःगु लरबर ज ूगु व खाखः जूगु सः थें जुयाः धाःगु खँ अष्पष्ट जुइ । बिचाः यायेगु क्षमता कम जुयावनी, अले ल्वगिं सुम्क च्वंच्वनेगु हे ययेकी ।

६) न्ह्यः यक्व मवइगु, तौल मगाइगु, कब्जियत, याकनं सासः फी मालीगु, च्व बांलाक मवइगु, इकुइगु, दनेबलय् खिउँसे च्वनीगु, सेक्सय् कमजोरी व चःति यक्व वइगु जुइ ।

७) थन न्ह्यथनागु अनेक लक्षण मध्ये छुं छुं लक्षण बुराबुरि जुइकाः पार्किन्सन मजूसां नं खनेदयेफुगु लक्षण खः । अथे जुयाः गबलें गबलें थ्व खँ सिइके थाकुइ कि वयात बुरा जुयाः थ्व लक्षण खनेदयावःगु खः कि पार्किन्सन ल्वचं थियाः ।

कारण
१) पार्किन्सन ल्वय् मनुखं अप्वः बिचाः यायेमाःगु ज्या यक्व यातकि अले नकारात्मक सोच व मानसिक तनावया कारणं जुइ ।

२) छुं कथं न्ह्यपुइ चोट लातकि न. पार्किन्सन ल्वय् जुइफु । थुकिं न्ह्यपुया ब्रेन पोस्टर कन्ट्रोल याइगु ब्वयात नं ड्यामेज यानाबी ।

३) छुं छुं अज्याःगु वासः, गुगु मानसिक ल्वचय् छ्यलेगु याय, गथेकि यक्वः न्ह्यः वइगु वासः व एन्टि डिप्रेसिभ वासःया यक्व सेवन यात धाःसां नं पार्किन्सन ल्वय् जुइयः ।

४) यक्व धूमपान यातकि, सुर्ती नयेगु यातकि, फास्टफुड अप्वः नयेगु यातकि, अय्लाः यक्व त्वनकि, प्रदूषण व लागू पदार्थया सेवन यातकि नं पार्किन्सन ल्वय् जुइयः ।

५) म्हय् भिटामिन ई मगातकि नं पार्किन्सन ल्वय् जुइफु ।

६) थीथी कथंया इन्फेक्सन न्ह्यपुइ भाइरसया इन्फेक्सन (इन्सेफलाइटिस) ।

७) न्ह्यपुइ हि थ्यंकीगु हिनुलिइ पंगः वइगु ।

८) म्याग्नीजया विषाक्तता

पार्किन्सनया प्राकृतिक चिकित्सा
१) पार्कित्सन ल्वय् लंकेत प्यन्हु न्यान्हु तक लखय् कागतिया रस ल्वाकछ्यानाः त्वनेमाः । थ्व बाहेक थ्व ल्वचय् नैंक्याःलः त्वनाबीगुलिं नं यक्व फाइदा याः ।

२) थ्व ल्वचय् ल्वगि मनुखं फलफुल व तरकारिया रस त्वन धाःसां नं यक्व फाइदा जुइ ।

३) मुस्या दुरुइ ल्वाकछ्यानाः हाम्वःयात दुरुइ ल्वाकछ्यानाः अथवा च्वलेचिया दुरु यक्व त्वनेगु यात धाःसां नं थ्व ल्वय् छुं न्हि लिपा हे लनावनी ।

४) ल्वगि मनुखं वाउँगु हः दुगु तरकारिया सलाद फक्व अप्वः छ्यलेगु यायेमाः

५) ल्वगि मनुखं गुगु पदार्थय् भिटामिन ईया मात्रा आपाः दु, ज्यःनां बेलिया रूपय् अज्याःगु पदार्थया अप्वः सेवन यायेमाः ।

६) ल्वगि मनुखं कफि, च्या, नशालु चीज, चि, चिनि, प्याकिङ्ग फूड नयेमजिउ ।

७) न्हिं न्हिं छुं भचा हलुका व्यायाम यात धाःसां नं छुं ई लिपा थ्व ल्वय् लनावनी ।

८) पार्किन्सन ल्वय् जुयाच्वंम्ह मनुखं थःगु बिचाःयात न्ह्याबलें सकारात्मक जुइका तयेगु व सदां लय्तायाच्वनेगु कुतः यायेमाः ।

९) थुकथं थीथी कथंया प्राकृतिक उपचार न्हियान्हिथं यानाच्वन धाःसा पार्किन्सन ल्वय् याकनं लनावनी ।

१०) गुपिं मनूतय्गु म्हय् भिटामिन डी यक्व मात्राय् दु, उपिं मनूतय्त पार्किन्सन ल्वय् जुइगु खतरा कम जक दइ । निभाःजः भिटामिन डीया तःधंगु स्रोत खः । तसकं हे कम जक अज्याःगु खाद्यपदार्थ दु, गुकी भिटामिन डी दइगु खः । म्हय् भिटामिन डीया मात्रा कम जुल धाःसा उकिं यानाः क्वँय् बमलाइगु, क्यान्सर, नुगःस्येँ सम्बन्धी ल्वय् व डाइबिटिज जुइफु । आः वयाः सीदयेधुंकूगु दु कि भिटामिन डी मगातकि पार्किन्सन ल्वय्या कारण नं जुइफु ।