ने. सं. ११४६ चिल्लागा त्रयोदशी -

ख्वाः बांलाकेत कुनू छ्यलादिसँ

कुनूनं (एलोवेरां) छ्यंगुलिइ जादूं थें ज्या याइ । अथे जुयाः कस्मेटिक्स अथवा समाःज्वलनय् कुनू यक्व हे छ्यलेगु याइ । छाय्कि कुनूलय् दुगु निताजि रासायनिक तत्व पोलिसाक्काराइडस व लिगनिनं छ्यंगूया स्वबलय् नं वनाः ब्याक्टिरिया वा ज्या मवःगु चिकंयात छ्यंगुलिं पितछ्वयाबिइ, गुकिं यानाः चिम्सँप्वाः चालावनी । थ्व बाहेक कुनूनं छ्यंगूया डेडसेल यात चिइकाः न्हूगु छ्यंगूया सेल्स दयेकी । गुकिं यानाः छ्यंगू स्वस्थ जुयाः बांलानावइ । कुनूयात प्राकृतिक रुपं जक छ्यःसां नं यक्व हे ल्वय् लनावनी, गथे कुनूया ला व रसं ख्वालय् बुलेबलय् ख्वाः नाइसे च्वनाः चमक नं दयावइगु खः ।

एलोवेरा जेल दयेकेगु तरिका
दकलय् न्हापां एलोवेरा (कुनू) द्यःनेयागु छबः तुलादिसँ । दुनें छताजि लाः थेंज्याःगु च्याप्च्याप् च्वंगु ताकुगु पदार्थ पिहां वइ, गुकिया सवाः खाइसे च्वनी । थुकियात छगः फय् दुहां मवनीगु सिसिइ तयाः पुसा क्वातुक तयाः फ्रिजय् तयादिसँ । बस् एलोबेरा जेल छ्यलेत तयार जुल । न्हिं न्हिं थ्व हे कयाः ख्वालय् भचा भचा बुलेगु यानादिल धाःसा ख्वालय् चमक दयावइ । अले छ्यंगू नं क्वातुइ । छितः यःसा थ्व म्ह छम्हं हे बुलादीसां जिउ । थुकिं म्ह छम्हंया छ्यंगू नाइसे क्यातुसे च्वनी, अले दाग छतिंहे मदयाः बांलासे च्वनी ।

ला हय्हय्कुंगु वंकेत
– कुनूया ला व बेसन ल्वाकछ्यानाः ख्वालय् बहनी लेप तयाबिल धाःसा ला हय्हय्कुंगु चकनावनी ।

– कागतिया ख्वला निनाः कुनूयागु लाया रसय् ल्वाकछ्यानाः ख्वालय् बुल धाःसा ला हय्हय्कुंगु सीमदयावनी ।
– ख्वालय् गनं नं हाकुक चातः वा फ्वातः दुसा गोलभ्या।ा व कुनूया ला ल्वाकछ्यानाः लेप तयादिसँ । हाकुगु भुजिंखि व यक्व न्ह्यवंनिसें कय्कय् कुनाच्वंगु ला नं चकनावनी ।
– कुनूया लाय् तुलसीयागु हःया रस ल्वाकछ्यानाः बुलाबिल धाःसां नं ला हय्हय्कुंगु चकनावनी ।
– कागतिया ख्वला निनाः भिंगु घ्यलय् ल्वाकछ्यानाः कुनूया रसलिसे क्वाकाः क्वं बुलेथें न्हिं न्हिं बुलाच्वन धाःसा ला हय्हय्कुंगु चकनावनी ।
स्यःकै वंकेत व ख्वाः बांलाकेत
– नीहःमाया ख्वलाया रस कुनूया लाःलिसे ल्वाकछ्यानाः क्वाकादिसँ, अले ख्वालय् बुलादिसँ । थुकिं स्यःकै व हाकुगु ती नं वनी ।
– धौ, चोकर व कुनूया ला ल्वाकछ्यानाः स्यःकै वयाच्वंथाय् पानाबिल धाःसा व याकनं सुनावनी ।
– ग्वाःया हा व कुनूया रस क्वाकाः म्वःल्हुइ स्वयां न्ह्यः ख्वालय् बुलाबिल धाःसा बाःछिया दुने स्यःकै न्ह्याबलेंया निंतिं हे वयेगु दिनावनी ।
– इमू, तुलसीया हः, कस्ति व कुनूया ला ल्वाकछ्यानाः ख्वालय् बुलादिसँ । ख्वाः तुइसे च्वनाः चमक नं दयावइ ।
– सादुरु, आरारोट व कुनूया ला ल्वाकछ्यानाः पेस्ट दयेकादिसँ । पिहां वनेबलय् मेकअपया रुपय् थ्व ख्वालय् पानादिसँ । ख्वाः चमक दयाः बांलाना वइ ।
– कुनूया लाय् चिचुं भचा तयाः म्हुतुसिइ इल धाःसा म्हुतुसि तज्याःगु लनावनी ।
– तुसि छ्यानाः रस पिकयादिसँ– थुगु रसयात उलि हे मात्राय् कयागु कुनूया रसय् ल्वाकछ्यानाः म्हय् गनं तज्याःथाय् बुलादिसँ, फ्वफ्वः धाइगु मजुयावनी ।
– बेसनय् हलू ल्वाकछ्यानाः उकी कुनूया रस क्वाकाः तयादिसँ, अले थथे यानाः दयेकागु लेप चिकंकंगु ख्वालय् बुलाबिल धाःसा ख्वाः चिकंकनीगु मजुयावनी । ख्वालय् चःति यक्व वइगु समस्या नं ज्यनावनी ।
– त्यपुचाय् बहनी कुनूया ला चिकनय् दायेकाः इलाबिल धाःसा ख्वालय् दाग कम जुयावनी ।
– श्रीखण्डया चुं, जिफ्वः व मलय् उति उति हे मात्राय् कयाः कुनूया लाःलिसे निनाः लेप दयेकादिसँ । थ्व लेपं ख्वालय् बुलाबिल धाःसा स्यःकै व भुजिंखि मदयावनी ।
– कुनूया लेप ख्वालय् पायेधुंकाः व गुलि गुलि गनावनी, ख्वाः उलिउलि तन्कय् जू थें जुयावइ । थथे जुइबलय् छिं लेप सिलाछ्वये धुंकाः एलोवेरा क्रिम अथवा दुरुया क्रिम अथवा मेगु छुं चिल्लो चिज बुलादिसँ, तन्कय् मजुयावनी ।