ओलीयात लित्तुमत्तु लिइगु ‘सम्मेलन’

नेपाल कम्युनष्ट पार्टी (नेकपा)या अध्यक्ष केपी शर्मा ओलीया नेतृत्वय् दुगु दुइ तिहाई बहुमतया वर्तमान सरकारया निंतिं आःतकया दकलय् तःधंगु हाथ्या जुया बिउगु निर्मला पन्त बलात्कार नापं हत्याकाण्ड खःसा आः वयाः अझ तःधंगु सवालया रुपय् दनावःगु दु इसाई राष्ट्र निर्माण ।

कञ्चनपुरया निर्मला पन्तयात बलात्कार यानाः स्याना बिउगु घटनाय् दोषीयात ज्वनाः कारवाही यायेगु ज्या प्यला न्ह्यवंनिसें याये मफयाच्वंगुलिं न्हियान्हिथं सरकार विरुद्ध सतकय् प्रदर्शन जुया वयाच्वंगु दु ।

थीथी राजनीतिक पार्टीनिसें सामाजिक संघ संस्था, सर्वसाधारण मनूतय्सं तकं उगु काण्डयात कयाः दोषीयात ज्वना कारवाही यायेमाल धकाः माग याना वयाच्वंगु खःसां लिपांगु इलय् वयाः सशस्त्र संघर्ष यायेगु पक्षय् दुगु विप्लबया नेतृत्वया नेकपां तकं सतकय् प्रदर्शननिसें थःपिंसं हे ज्वनाः कारवाही यायेगु धकाः तकं घोषणा याःगु अवस्था दु ।

ओली सरकारं हे दोषीयात सुचुकातल धकाः न्ह्यथँसें थःपिंसं हे ज्वनाः कारवाही यायेगु धकाः विप्लवया नेतृत्वया नेकपां गुगु कथं घोषणा यात उकिं नेपालय् गनं समानान्तर सरकार जकं दुगु मखुला धकाः न्ह्यसः ब्वलना वइगु स्वाभाविक हे खः । यदि थ्व इलय् विप्लव नेतृत्वया सरकारं निर्मला पन्त काण्डया दोषीयात ज्वनाः कारवाही यानागु जुल धकाः खँ पित हल धाःसा व उकियात जनतां विश्वास यात धाःसा ओली सरकारया निंतिं तःधंगु हाथ्या नापनापं नैतिक संकट वयेफु ।

निर्मला पन्त काण्डया कारणं प्रतिपक्ष जक मखु स्वयं सत्तापक्षया नेता, कार्यकर्तातय्सं तकं ओली सरकारया आलोचना यानाः पिहां वयाच्वंगु दु । ओली सरकारं माःगु कथंया अनुसन्धान यानाः दोषियात ज्वनाः कारवाही यायेगु ज्या मयात धकाः व्यापक रुपं आलोचना हे जुयाच्वंगु अवस्थाय् लाकाः उगु काण्डया प्रमाण नष्ट याःपिं धकाः छानविन लिपा निलम्बनय् लाःपिं प्रहरीत तकं प्रधानमन्त्रीया ज्याकुथिइ हे वनाः निवेदन बिइगु ज्या तकं यात धकाः खँ वःगुलिं सरकारप्रति झन हे शंका ब्वलनीगु स्वाभाविक हे खः ।

थौं राजनीतिक पार्टीया नेता कार्यकर्तानिसें सर्वसाधारणया छेँय् छेँय् तकं निर्मला पन्त काण्डया बारे चर्चा जुयाच्वंगु दु । ओली सरकार गठन लिपा थुलिमछि चर्चा जूगु अले सकलसिनं सरोकार क्यंगु विषय सायद निर्मला पन्त काण्ड हे जुइ ।

निर्मला पन्तया बलात्कार लिपा हत्याया घटना दोषीयात ज्वनाः कारवाही यायेगु ज्या याये मफयाच्वंगु हे इलय् आः हाकनं न्हूकथंया हाथ्याः ओली सरकारयात वःगु दु, व खः– इसाई राष्ट्रया सवाल । भारत, चीन, पाकिस्तान, श्रीलंका लगायतया देसय् याके मबिउगु एसिया प्यासिफिक सम्मेलन अन्ततः नेपालय् विवादया दथुइ क्वचायेकेगु ज्या जूगु दु ।

थ्यंमथ्यं २० करोड तका खर्च यानाः याःगु उगु सम्मेलन धइगु गैर सरकारी संस्थां याःगु जूसां नं थीथी देय्या राष्ट्र प्रमुखनिसें मेमेपिं नापं याना द्वःछिम्हं मल्याका मनूत सहभागी जूगु अले विवाद मजुइमाः धकाः हिन्दू, बौद्ध, मुस्लिम धर्मगुरुपिंत तकं सहभागी याकूगु जूसां नं अन्ततः धार्मिक रुपं उगु सम्मेलन विवादय् हे वल ।

इसाई धर्म प्रचार याइगु संस्था धकाः ता ई न्ह्यवंनिसें चर्चाय् वयाच्वंगु अले इलय् ब्यलय् नेपाःया राजनीतिक पार्टीया सांसदतय्त विदेशय् चाःहिइके यंकेगु ज्या तकं याना वयाच्वंगु युनिभर्सल पिस फेडेरेसनया ग्वसालय् येँय् जूगु सम्मेलनं मनूतय्त धार्मिक रुपं बांमलाक हे विभाजित याना बिउगु दु ।

थःगु पार्टीया नेता कार्यकर्तातय्सं तकं विरोध यानाहःगु अवस्थाय् थुगु खँयात इलय् हे नेतृत्वं समाधान याना वने मफत धाःसा निर्मला पन्तया हत्याकाण्ड थें हे ओली सरकारयात मदिक्क लित्तुमत्तु लिनाच्वनीगु मुद्दा थ्व एसिया प्यासिफिक सम्मेलन नं छगू जुइ

प्रमुख प्रतिपक्ष दल नेपाली कांग्रेसं बहिस्कार याःगु अले तराई लागाय् हिन्दूतय्गु संगठनं सभा हे यानाः विरोध याःगु नाप नापं सत्तारुढ दल नेपाल कम्युनिष्ट पार्टी (नेकपा)य् तकं विवाद ब्वलंकूगु थुगु सम्मेलनं यानाः नेपालय् हाकनं छकः धर्मया नामय् तिब्र बहस सुरु जूगु दु । मुलुक धर्मनिरपेक्ष राज्य जूगुलिं हे सरकार तकं क्रिश्चियन धर्मया निंतिं न्ह्याःवन धकाः द्वपं बिइगुनिसें आः मुलुकय् हिन्दू राज्य यायेमाः धाइपिंत थःपिनिगु सः तयेगु छगू अवसरया रुपय् न्ह्यःने वःगु दु ।

नेपाःया संविधानय् नेपाल राज्य धर्मनिरपेक्ष राज्य धकाः उल्लेख यानातःसां नं धर्मनिरपेक्ष धायेबलय् सनातननिसें चले जुया वयाच्वंगु धर्म, सांस्कृतिक संरक्षण लगायत धार्मिक, सांस्कृतिक स्वतन्त्रता धकाः थुइकेमाः धकाः च्वयातःगु दु ।

थुगु कथंया परिभाषां हे नेपालय् पूर्णरुपं धर्म निरपेक्षता मवःनि धकाः धायेगु यानाच्वंगु खःसा थ्व हे इलय् वयाः क्रिश्चियन धर्मयात प्रचार यायेगु कथं राज्य हे लगे जुल धकाः द्वपं बिइगु थाय् दयेक ज्याखँ खनेदत, उकिं याना नेपालय् धार्मिक सवालय् तिब्र रुपं बहस यायेगु व धर्म निरपेक्षताया नामय् सनातन धर्मयात हाथ्या वल धकाः चर्चा याइपिनिगु निंतिं थाय् तःचाकः जुया बिउगु दु ।

सम्मेलनय् गुगु कथं क्रिश्चियन धर्मगुरुपाखें हे प्रधानमन्त्री केपी शर्मा ओलीयात सिरपाः बिइगु, इसाई राष्ट्र निर्माणया नितिं आह्वान यायेगु ज्या जुल थ्व धइगु छगू कथं धार्मिक ख्यलय् तःधंगु लिच्वः लाकीगु व अर्थपूर्ण ज्या खः ।

उद्घाटन समारोहय् विवाद वइ धकाः मेमेगु धर्म गुरुपिंत नं ब्वया स्पष्ट रुपं हे भाषण बिइगु इलय् कोरियाया युनिफकेशन चर्चया संस्थापक डा. हक जा हानं इसाई राष्ट्र दयेकेत आह्वान यायेगु ज्या जक मखु थः स्वयं यसुया म्ह्याय् धकाः परिभाषा बिइगु ज्या यात, थुकिं यानाः स्पष्ट रुपं व क्रिश्चियनतय्गु ज्याझ्वः धकाः थुइके फइगु अवस्था जुल ।

स्वनिगलय् तसकं विरोध मजूगु जूसा प्रधानमन्त्री केपी शर्मा ओली वय्कःया कलाः, अथे हे झिंन्यासःम्ह स्थानीय निकायया प्रतिनिधिपिं व उमि कलाःपिंत तकं क्रिश्चियन धर्म कथं आर्शिवाद बिइगु ‘ब्लेसिङ’ ज्याझ्वः याइगु जुइ । उगु कथंया ज्याझ्वः दबाब व विरोधया दथुइ स्थगित जूगु दु ।

मखुसा जनप्रतिनिधितय्त अप्रत्यक्ष रुपं क्रिश्चियन हे दयेकेगु कथंया योजना हःगु खनेदु धकाः धायेफइगु अवस्था खः । नेपाः एसियाय् लाःगु जुयाः थुगुसी एसियाम्ह हे प्रतिनिधि कथं कोरियाया युनिफकेशन चर्चया संस्थापक डा. हक जा हानयात न्ह्यःने तयाः ज्या याःगु दुसा प्रधानमन्त्री ओलीयात सिरपाः बिइगु ज्या तकं याःगु दु ।

थुगु ल्याखं स्वल धाःसा थुगुसीया सम्मेलन नितान्त क्रिश्चियन धर्मयात अझ ब्यापकता यायेगु योजना कथं हे याःगु खः धकाः धायेफइगु अवस्था दु । ओली सरकारयात गुगु कथं निर्मला हत्याकाण्डया समस्या जुयाच्वंगु खः आः थ्व सम्मेलन व इसाई राज्य दयेकेगु नितिं पहलकदमि याःगु द्वपं नं निरन्तर रुपं लानाच्वनीगु अवस्था वइ ।

हिन्दू राज्य घोषणा यायेमाः धाइपिनिगु निंतिं ततसलं हालेगु थाय् दयेकेगु ज्या जूगु दुसा थुकिं यानाव्ः वर्तमान सरकार व नेपाल कम्युनिष्ट पार्टी (नेकपा) दुने तकं तःधंगु समस्या वयेफइगु संभावना दु । व हे पार्टीया नेता कार्यकर्तातय्सं तकं विरोध यानाहःगु अवस्थाय् थुगु खँयात इलय् हे नेतृत्वं समाधान याना वने मफत धाःसा निर्मला पन्तया हत्याकाण्ड थें हे ओली सरकारयात मदिक्क लित्तुमत्तु लिनाच्वनीगु मुद्दा थ्व छगू नं जुइ ।

 

सम्बन्धित बुखँ

LEAVE YOUR COMMENTS