निःशुल्क डायलासिसय् समस्या विरामी अप्वल, मेसिन थप मजू

येँ – सरकारं जलास्येँ (किडनी)या ल्वगितय्त निःशुल्क बिया वयाच्वंगु डायलासिस उपचारया निंतिं विरामीतय्सं पाः कायेत हे थाकुयाच्वंगु दु । सरकारं देय् न्यंकं यानाः न्यय्छगू सरकारी व निजी अस्पतालय् निःशुल्क डायलासिस यायेगु सुविधा बिया वयाच्वंगु दुसां थुपिं अस्पतालय् पाः कायेत हे यक्व ई पिइ मालाच्वंगु दु ।

दँय्दसं जलास्यँेया ल्वगित अप्वया वनाच्वंगु, तर सरकारं डायलासिस यायेगु मेसिन धाःसा थप मयाःगुलिं यानाः थज्याःगु समस्या वयाच्वंगु खः । पाः कायेमफयाः थःपिंसं यक्व ध्यबा पुलाः निजी अस्पतालय् डायलासिस याकः वनेमालाच्वगु खँ ल्वगितय्सं धयाच्वंगु दु ।
थौंकन्हय् दँय् हे स्वद्वः धयाथें डायलासिस यायेमाःपिं जलास्येँया ल्वगित थप जुयाच्वंगु दु ।

अथेहे स्वद्वलं मल्याक ल्वगितय्सं न्हापांनिसें हे डायलासिस उपचार याका वयाच्वंगु दु । तर निःशुल्क डायलासिस यायेगु मेसिन धाःसा माक्वः थप जूगु मदु । अथे जूगुलिं ध्यबा मदुपिं ल्वगितय्त उपचार याकेत तसकं थाकुयाच्वंगु खँ राष्ट्रिय मृगौला पीडित संघं धाःगु दु ।

संघया अध्यष समिर कुमारं थःपिंसं सरकारयात थुकिया बारे जानकारी बिसें मेसिन थप यायेत धायेधुनागु दुसां सरकारं धाःसा वास्ता मयानाच्वंगु खँ धयादीगु दु । ‘न्हापा निःशुल्क याकेगु निंतिं आन्दोलन यायेमाःगु खः, आः मेसिन थप यायेगु निंतिं नं अनशन हे च्वनेमालीगु थें च्वं’ वय्कलं धयादीगु दु ।

वय्कःया कथं थौंकन्हय् प्यसलं मल्याक ल्वगित निःशुल्क डायलासिसया निंतिं पाः पियाच्वंगु दु । ध्यबा पुलाः उपचार यायेगु निंतिं निजी अस्पतालय् छक्वः डायलासिस यायेत नीन्यासः निसें न्याद्वः तका तक खर्च यायेमाः ।

शहिद धर्मभक्त राष्ट्रिय प्रत्यारोपण केन्द्रया कार्यकारी निर्देशक व जलास्येँ व स्येँ प्रत्यारोपण विज्ञ डा. पुकारचन्द्र श्रेष्ठं छगू अञ्चल अस्पतालय् झिगः मेसिन तयेफत धाःसा यक्व विरामीत लाभान्वित जुइगु खँ बिबिसीयात धयादीगु दु । वय्कःया कथं झिगः मेसिन दत धाःसा छन्हुं स्वीम्हेस्यां सेवा कायेखनी ।

स्वास्थ्य मन्त्रालयया अधिकारीतय्सं दक्ष जनशक्ति मदुगु व थ्व उपचारयात माःगु मेसिन व वासः खर्च नं थिकेगु जूगुलिं सेवा विस्तार यायेत थाकुयाच्वंगु खँ धयाच्वंगु दु ।