कोरोना विरुद्ध सरकारं काल कडा निर्णय

येँ – विश्वय् महामारी जुयाः न्यना वनाच्वंगु कोरोना प्रकोप नेपालय् दुमकायेगु लागिं सरकारं म्हिगः आः तकया हे दकलय् कडा निर्णय याःगु दु । स्कुलय् चैत ५ गते तक सम्पूर्ण परिक्षा सिधयेकि धकाः सरकारं बाःछि न्ह्यः हे निर्देशन बियातःगु खःसा म्हिगः थ्व परिक्षा क्वचायेवं सार्वजनिक रुपं लिच्वः लाइ कथंया तःधंगु निर्णय याःगु खः ।

सरकारया म्हिगः च्वंगु बैठकं कोरोना भाइरसया संक्रमण जुइफइ अवस्था दु धासें अप्वः मनूत मुनीगु फुक्क थाय्त बन्द यायेत निर्देशन बिउगु दु । सरकारी निर्देशन कथं आः शिक्षण संस्था, फिल्म क्यनीगु हल, जिम हेल्थ क्लब लिसें थीथी कथंया सभा सम्मेलन नं याये मदइगु जूगु दु । २५ म्ह स्वयां अप्वः मनू मुनीगु छुं नं ज्याझ्वः मयायेत व सार्वजनिक यातायातय् नं क्षमता स्वयां अप्वः मनू मतयेत नं निर्देशन बिउगु दु ।

उकथं हे सरकारं माःगु अवस्थाय् जक छेँनं पिहां वनेत नं निर्देशन बिउगु दु । अनावश्यक रुपं छेँनं पिहां मवयेत व थीथी कथंया सामाजिक व सांस्कृतिक ज्याझ्वः समेत मयायेत नं सरकारं निर्देशन बिउगु दु । सरकारं युरोप लगायत फुक्कं पश्चिमी मुलुक, पश्चिम एसिया लगायत खाडी मुलुकत, इरान, टर्की, मलेसिया, जापान वइपिं व उगु मुलुकं ट्रान्जित दयेकाः गुगुं नं देशं वइपिं यात्रुयात शुक्रवाः चान्हय्निसें नेपाः दुमकायेगु कथं प्रतिबन्ध तयेगु निर्णय नं याःगु दु । सरकारी निर्णय लिपा पूर्व घोषित सार्वजनिक ज्याझ्वःत धमाधम स्थगित याःगु समाचार वयाच्वंगु दु ।

लिसें म्हिगः च्वंगु बैठकं सञ्चार माध्यम व सामाजिक सञ्जालं गलत सुचं व अभिव्यक्ति बिल धाःसा कानून कथं कडा कारबाही यायेगु ख्याच्वः नं बिउगु दु । थ्व स्वयां न्ह्यः सामाजिक सञ्जालय् थीथी कथं भ्रम ब्वलंकेगु समाचार सञ्चार जुयाच्वंगु धासें आः अज्याःगु समाचार सम्प्रेषण याइगु सञ्चार माध्यम व व्यक्तियात नं कारबाही यायेगु खँ धाःगु दु ।

मेखे नेपालय् कोरोना भाइरसया संक्रमण खने मदुसां नं गुगुं नं इलय् प्रभावित जुइफइगु ख्याच्वः विश्व स्वास्थ्य संगठन (डब्लुएचओं) बिउगु दु । नेपाः सहित दक्षिण पूर्वी एसिया क्षेत्रय् कोरोना भाइरस न्यने फइगु धासें डब्लुएचओं कडा चेतावनी बिउगु खः । डब्लुएचओं आः दक्षिण पूर्वी एसियाली देशय् कोभिड–१९ विस्तार मजुइकेत यानाच्वंगु कुतः यदि प्रभावकारी जुइ मफुत धाःसा थुकिया अवस्था भयावह जुइ फइगु ख्याच्वः नं बिउगु खः ।

डब्लुएचओया दक्षिण पूर्वी एसियाली क्षेत्रीय निर्देशक डा. पुनम खेत्रपाल सिंहं तत्काल भाइरस मन्यंकेगु खःसा माःगु सावधानी नालेत नं दक्षिण पूर्वी एसियाली सरकारयात इनाप याःगु दु । डा. सिंहं संक्रमण मन्यंकेत राष्ट्रिय व समुदाय स्तरं एकीकृत कुतः यायेमाः धासें थुकिया लागिं आपालं ज्या यायेमाःगु खँ नं धयादीगु दु । डब्लुएचओया कथं दक्षिण पूर्वी एसियाली राष्ट्रया रुपय् नेपाः सहित झिंछगू देय् दुथ्याः । थ्व झिंछगू राष्ट्र मध्ये च्यागू देशय् कोरोना भाइरस संक्रमण खने दयेधुंकूगु दु ।

एसईई नं स्थगित
कोरोना विरुद्ध कडा पलाः ल्ह्वनेगु झ्वलय् सरकारं थनिनिसें कायेगु कथं निर्धारण यानातःगु एसईई परीक्षा नं स्थगित याःगु दु । मेगु निर्णय मजूतले थ्व परीक्षा स्थगित यायेगु निर्णय सरकारं याःगु खः । कोभिड–१९ रोकथाम तथा नियन्त्रण उच्च स्तरीय समितिया म्हिगः च्वंगु बैठकं एसईई परीक्षा स्थगित यायेगु निर्णय याःगु खः । उपप्रधान लिसें रक्षामन्त्री ईश्वर पोखरेलया अध्यक्षताय् च्वंगु बैठकं परीक्षा स्थगित यायेगु निर्णय याःगु खः । थ्व स्वयां न्ह्यः सरकारं एसईई परीक्षा मदिकगु धासें फुक्कं परीक्षा केन्द्रय् हेल्थ डेक्स तयाः जूसां परीक्षा कायेगु खँ धयाच्वंगु खः । तर म्हिगः कोरोना विरुद्ध कडा पलाः ल्ह्वनेत थीथी ज्याझ्वः यायेगु धकाः निर्णय यायेवं थज्याःगु इलय् ४ लाख स्वयां अप्वः मस्त सहभागी जुइगु एसईई परीक्षा कायेगु पाय्छि मजुइगु खंकाः स्थगनया निर्णय याःगु खः ।