डायलासिस वा प्रत्यारोपण
थःगु स्वास्थ्य बारे प्रमपाखें हे जानकारी
येँ – प्रधानमन्त्री केपी शर्मा ओलीं थःगु स्वास्थ्यया बारे पार्टीयात थम्हं हे जानकारी यानादीगु दु । नेकपाया अध्यक्ष समेत जुयादीम्ह प्रम ओलीं म्हिगः च्वंगु पार्टीया सचिवालय बैठकय् थःगु जलस्यें (किड्नीं) ज्या मयाःगु कारणं डायलासिस शुरु याये माःगु जानकारी बियादीगु खः ।
थनया ग्रान्डी अस्पतालय् बुधवाः वय्कःया डायलासिस याःगु खःसा विहीवाः हानं डायलासिस याःगु खः । आः थौं वा कन्हय् हानं छक्वः डायलासिस याये मालीगु खँ धाःगु खः । वय्कःया स्वास्थ्यया परीक्षण जूगु दुसा छुं रिपोर्ट अझ नं वये मानिगु जुयाः आः लिपाया पलाः छु जुइ धकाः डाक्टरतय्सं धाये मफुनिगु खँ सीदुगु दु ।
प्रम ओलीं सचिवालय बैठकय् आः नियमित डायलासिस यानाच्वनेगु वा जलस्येँ हे प्रत्यारोपण यायेगु बाहेक मेगु विकल्प मदुगु जानकारी नं यानादीगु खः । तर छु याःसा बांलाइ धइगु सुझाव धाःसा आः छुं रिपोर्ट वयेधुंकाः जक डाक्टरतय्सं बी फइगु खँ धाःगु दु ।
प्रम ओलीं थनिं १२ दँ जलस्येँ प्रत्यारोपण यानादीगु खः । सामान्यतया अथे प्रत्यारोपण यानातःगु जलस्येँ झिदँ लिपा बांलाक ज्या याये फइ मखु । तर प्रम ओलीया आत्मशक्ति तसकं बल्लाःगु जुयाः झिदँ लिपा तक नं वय्कःया जलस्यें ज्या यानाच्वंगु खँ चिकित्सकतय्सं धायेगु याः ।
वंगु छुं ई न्ह्यवंनिसें धाःसा वय्कःयात जलस्येँय् लगातार हे समस्या वयाच्वंगु कारणं उकियात कयाः थीथी कथंया उपचार यायेधुंकूगु दु ।
प्रम ओली थः जलस्येँया विरामी जुयादीगु कारणं वय्कलं नेपालय् जलस्येँया फुक्क हे विरामीतय्त डायलासिस निःशुल्क याना बिउगु खः । थुकिं यानाः विशेष यानाः आर्थिक समस्याय् लानाच्वंपिं जलस्येँया विरामीतय्त तःधंगु राहत जूगु खँ उमिसं धायेगु याः ।
भिंतुना ज्याझ्वलय् मथ्यन
थुगुसी नेपाल संवत् ११४० न्हूदँया लसताय् येँ, थिमि व यलय् जुइगु भिंतुना ज्याझ्वलय् नं प्रधानमन्त्री केपी ओलीं मूपाहां कथं ब्वति काइगु ज्याझ्वः अन्तिम इलय् वयाः रद्द जूगु खः । अजरबैजानं लिहां वयेवं वय्कःया स्वास्थ्य बांलाः मजुइवं वय्कलं भिंतुना ज्याझ्वलय् सम्बोधन यायेगु ज्याझ्वः रद्द जूगु खः ।
प्रम ओलीं न्हूदँ न्ह्यः थःत मूपाहांया लागिं इनाप याः वःपिं सकलें न्हूदँ ग्वसाः खलःया दुजःपिंत थः थुगुसी स्वास्थ्यं साथ बिल धाःसा न्ह्याथे यानाः नं भिंतुना ज्याझ्वलय् वयाः सम्बोधन याये धकाः बचं बियादीगु खः ।
वय्कलं स्वनिगःया नेवाः समुदाय दथुइ थःगु छुं खँ तयेमाःगु दनि धासें ज्याझ्वलय् वयेगु खँ कनादीगु खः । तर विदेशं लिहां वयेवं वय्कःया म्ह मना वःगुलिं उपप्रधानमन्त्री इश्वर पोखरेलयात छ्वया हःगु खः ।
LEAVE YOUR COMMENTS