चिडियाखानाय् न्हूम्ह जीव

यल – थनया सदर चिडियाखानाय् न्हापांखुसी छम्ह न्हूम्ह जनावर अवलोकनया निंतिं तःगु दु । चिडियाखानाय् अवलोकनया निंतिं न्हापांखुसी तःम्ह जनावर ‘रिङ टेल्ड ल्युमर खः । चिडियाखानाया सूचना अधिकारी लिना पालिखें कनादीकथं वंगु शुक्रवाःनिसें चिडियाखाना अवलोकनया निंतिं वइपिंत क्यनेत उम्ह जनावर तःगु खः ।

विशेष यानाः अफ्रिकी देशय् जक दइम्ह रिङ टेल्ड ल्यमुर जनावरया आयु १६ दँनिसें अप्वलय् १९ दँ तक जक खः । थ्व जनावर चिडियाखानाया निंतिं जिल्ला वन ज्याकू येँय् नं उपलब्ध याकूगु खः । थौंकन्हय् सदर चिडियाखानाय् १०२७ प्रजातिया १,२१९ जीवजन्तु दु । छुं दँ न्ह्यःतक करिब ८००या हाराहारिइ जीवजन्तु दुगु चिडियाखानाय् थगुने आपालं थीथी प्रजातिया झंगःपछि हःगुलिं जीवजन्तुया ल्याः अप्वःगु खः ।

चिडियाखानाय् अवलोकन यायेत वइपिनिगुपाखें दँय्दसँं १२ गू निसें १४ गू करोड तका आम्दानी जुयाच्वंगु दुसा थन स्वदेशी व विदेशी यानाः दय्दसं छगू लाख स्वयां अप्वः अवलोकनकर्ता वयेगु यानाच्वंगु दु । चिडियाखानय् अवलोकनया निंतिं स्वदेशी, विदेशी, सार्क राष्ट्र व १२ दँ क्वय् व विद्यार्थीतय् निंतिं बिस्कं बिस्कं शुल्क क्वःछिनातःगु दु ।