चुनाव कुन्हु वा वयेफु

येँ(नेपालभाषा टाइम्स)- थ्वहे वइगु वैशाख ३० गते स्थानीय चुनावया मतदान जुइ कुन्हु हे घनघोर वा वयेफुगु खँ मौसमविद्तय्सं धाःगु दु । वकुन्हु वा वयेफु धकाः मौसमविद्तय्सं छुं न्हि न्ह्यः नं धाःगु खःसां आः धाःसा भारतया बंगालया खाडीइ समुन्द्री आँधी वयेफुुगु जूगुलिं ३० गते तसकं वा वइगु सम्भावना अप्वया वंगु खँ धाःगु दु ।

बंगालया खाडीइ वइगु उगु समुन्द्री आँधीयात ‘आसानी’ धकाः नां बियातःगु दु । उगु आँधीं यानाः नेपाःया विशेष यानाः पूर्वी क्षेत्रय् तसकं वा वइगु सम्भावना दु । २७ गते बहनीनिसें थ्व आँधी शुरु जुयाः ३० गते दकलय् प्रभावकारी जुइगु खँ नं मौसमविद्तय्सं धाःगु दु ।

वकुन्हु नेपाःया फुक्क थासं छक्वलं वा वइगु खने मदुसां गनं वः गनं मवः जुइ फइगु खँ नं धाःगु दु । तर न्ह्याथाय् वा वःसां निर्वाचन आयोग धाःसा वकुन्हु सतर्क जुइमाःगु सुझाव मौसमविद्तय्सं बिउगु दु । तसकं वा वयाः मतपत्र, मतपेटिका स्यंके फुगु जूगुलिं उकिया सुरक्षाय् विशेष बः बीमाःगु खँ नं धाःगु दु । तसकं वा वल धाःसा मतदातात नं म्हो जक पिहां वइगु जुयाः मतदान हे प्रभावित जुइ फइगु खँ नं थन धयाहःगु दु ।

सम्बन्धित बुखँ

LEAVE YOUR COMMENTS