क्यानडाया नेवाः समाज

नेवाः कल्चरल सोसाइटी अफ अल्बर्टाया स्थापना नेवाः सांस्कृतिक सम्पदायात क्यानडाया जनता दथुइ न्ह्यब्वेत क्यानाडाया एडमन्टन सिटीइ च्वना वयाच्वंपिं नेवाः नेपालीतय् कुतलं सन् २०१३ नीस्वंगु खः ।

एडमण्टन सिटीया स्थानीय सरकारय् दर्ता यानाः नीस्वंगु थ्व संस्थाय मू उद्देश्य नेवाः नखःचखः, भाय्, साहित्य, प्याखं, परम्परागत वसः तिसा, नसाज्वलं, सम्पदा आदियात वर्तमान व भावी सन्ततियात हस्तान्तरण यायेगु, संरक्षण यायेगु व विदेशय् च्वनाः नं थःगु गरिमामय इतिहासयात म्वाकातयेगु व विदेशय् च्वंपिं मेपिंत नं परिचय बिइगु खः ।

विदेशय् च्वनाच्वंपिं न्हूपुस्ता व अनया बूपिं सन्ततियात थःपिनिगु गौरवमय इतिहास म्हसिइके बियाः उकियात महसुस याकेबीगु निंतिं संस्थां थीथी ज्याझ्वः याना वयाच्वनागु खँ संस्थाया संस्थापक उपाध्यक्ष प्रा. डा. केशव श्रेष्ठं कनादीगु दु ।

एडमण्टन सिटीइ ताःई न्ह्यव निसें च्वना वयाच्वनादीपिं डा. हेमन्तराज जोशी, त्रिप्रसाद धौभडेल, पवन न्याछ्यों, जुही सुवाल गुभानी, वीरेन्द्र कायस्थ, रविन्द्र श्रेष्ठ, सरद चित्रकार, नविन रञ्जीतकार, सरजु रञ्जित थेंज्याःपिं सक्रिय नेवाःतय् छगू भेलां थ्व संस्था नीस्वनेत पहल यानाः उगु हे दँ निसें म्हपुजा, न्हूदँया भिंतुना भव्यपूर्वक न्यायेकेगु सुरु याःगु खः ।

उगु ज्याझ्वलय् नेवाः परम्परायात क्यानाडेलि जनतायात म्हसिइका बीगु निंतिं स्थानीय थीथी व्यक्तित्वपिंत ज्याझ्वलय् ब्वनाः म्हपुजाया विधीकथं थ्व नखः तःजिक न्यायेकूगु खः । उबलय् थुगु ज्याझ्वःयात समाचार स्थानीय टिभी, पत्रिपत्रिकाय् नं थाय् बिउगु खः । यःमरि पुन्हिबलय् संस्थां थः ल्यायम्ह पुस्तायात यःमरि पुन्हि नखःया छाय् हनेगु धयागु जानकारी बिइगु निसें यःमरि दयेकेगु नं स्यना वयाच्वंगु दु ।

उगु इलय् नं नेवाः वसतं पुनाः थीथी नेवाः प्याखं न्ह्यब्वयेगु, चिनाखं न्यंकेगु, न्ह्यसःलिसः कासा यायेगु व थीथी नेवाः परिकारया म्हसिका बीगु ज्या जुया वयाच्वंगु दु । अथेहे नेपाःया नेवाःतय्सं न्यायेका वयाच्वंगु थीथी जात्रा पर्वबारे थनया ल्याय्म्ह पुस्तायात जानकारी बियाः अपनत्व अप्वयेकेगु निंतिं बुंगद्यःया जात्रा, कुमारी जात्राया इलय् चित्र ब्वज्या यानाः नखःचखःया बारे परिचयात्मक संवाद ज्याझ्वः यायेगु नं याना वयाच्वंगु दु ।

भगवान बुद्ध नेपालय् जन्मे जुयाः विश्वय् शान्तिया अग्रदूत जुया बिज्यानाच्वंगु दु । स्वांयाः पुन्हि (बुद्ध जयन्ती) कुन्हु स्थानीय भिक्षु भिक्षुणीपिनिगु अग्रताय् स्वांया पुन्हि न्यायेकाः गोष्ठी नं याना वयाच्वंगु दु । थ्व इलय् भिक्षुपिंत पञ्चदान बीगु, ध्यान व योगासन स्यनेगु नं जुयाच्वंगु दु ।

विदेशय् नेवाः भाय् व लिपा लोप मजुइमा धकाः स्यनामी हे तयाः नेवाः भाय् व रञ्जना लिपि स्यनेगु ज्या नं जुयाच्वंगु दु । थ्व कक्षाय् सकसितं ब्वति कायेगु निंतिं प्रोत्साहित याना वयाच्वंगु दु । एडमण्टन सहरय् दँय्दसं अगस्ट महिनाय् ७५ गू देय्या थीथी झाँकी सहित तःधंगु अन्तर्राष्ट्रिय हेरिटेज फेस्टिभल जुइ ।

उगु फेस्टिभलय् समाजपाखें लाखे, कुमारी, भैरव थेंज्याःगु प्याखंया लिसें लोकप्याख., नेवाः भेषभुषा, नेवाः बाजं, संगीत न्ह्यब्वयेगु याना वयाच्वंगु दु । थ्व पर्वय् ब्वति कायेगु निंतिं ल्याय्म्हतय्त लछि न्ह्यवनिसें हे तालिम बिइगु सुरु जुइ । अथेहे विश्व जनजाति दिवसया इलय् नेवाः समाजं जनजातितय् साहित्य सभा याना वयाच्वंगु दुसा सिटीं हे ग्वसाः ग्वइगु प्याखं धेंधेंबल्ला कासाय् नेवाः प्याखनं विशेष थाय् कया वयाच्वंगु दु ।

अमेरिकाया लिसें मेमेगु देशय् जुइगु नेवाः महासम्मेलनय् एडमण्टनया थ्व समाजं नं ब्वति कायेगु लिसें थीथी ज्यापौ न्ह्यब्वयेगु नं याना वयाच्वंगु दु । अथेहे नेपालय् प्राकृतिक प्रकोप, भुखाय्, खुसिबाः वइगु चलः वइगु जुइबलय् मेमेगु समाजलिसे जानाः नेपालय् ग्वाहालि छ्वयेगु व्यवस्था नं याना वयाच्वंगु दु ।

थ्व दँय् येँय् जूगु हलिं नेवाः सम्मेलनय् नं नेवाः समाज एडमण्टनपाखें भाजु त्रिप्रसाद धौभडेलं प्रतिनिधित्व यानादीगु खः । अमेरिका व क्यानाडाया मेमेगु सहरय् नेवाः समाजया साधारण सभाय् नायः भाजु डा. हेमन्त जोशी, त्रिप्रसाद धौभडेल, सरजु रञ्जित व मेमेपिं दुजःपिंसं ब्वति कया वयाच्वंगु दु ।

विशेष यानाः थ्व समाजं विदेशय् नेवाः भाय्, लिपिया संरक्षण यायेत आवश्यक तायेका वयाच्वंगु दु । थ्व हाथ्यायात समाधान यायेत नेवाः भाय्या कक्षा न्ह्याकेगु निंतिं अझ अप्वः कुतः याना वयाच्वंगु दु । लिसें ल्याय्म्ह्तय्त नेवाः भाय् छ्यलाबुला यायेत प्रोत्साहित याना वयाच्वंगु दु ।

थथे थीथी ज्याझ्वः याना वायच्वंगु नेवाः समाजय् अल्बर्टाया प्रेमियर सम्माननिय राचेल नोटले, मन्त्री रिचार्ड फिहान, मन्त्री अमरजीत सोनीपिंसं नियमित रूपं ब्वति कयाः प्रोत्साहन याना वयाच्वनादीगु दु ।

येँया पुन्हि, पाहाँचःह्रे, सिथि नखः, जनबहाःद्यःया जात्रा, बिस्काः जात्रा, म्हपुजा, यःमरि पुन्हि थेंज्याःगु नखःचखःबलय् तातापाकं निसें नेवाःत थीथी परिकार ज्वना एडमण्टन सिटीइ वयाच्वनीगुलिं यानाः थःथः जानाः संस्कृतिया संरक्षण यायेत बः बियाच्वंगु खँ थुगु समाजं तायेका वयाच्वंगु दु ।

वंगु जून २२, २०१९ कुन्हु समाजया स्वक्वःगु कार्यकारिणी दुजःपिं ल्ययाः नेवाः गतिविधियात क्यानाडाया अल्बर्टा प्रान्तय् अझ सशक्त संगठन कथं न्ह्याः वनेगु अठोट याःगु दु । न्हूगु कार्यसमिति डा. हेमन्त जोशीया नेतृत्वय् नीस्वंगु दु ।

कार्यसमितिइ उपाध्यक्ष कथं त्रिप्रसाद धौभडेल, सचिव वीरेन्द्र कायस्थ, कोषाध्यक्ष वीरेन्द्र पिया, भाषासाहित्य कला पाखें दुजः आनन्द महर्जन, संस्कृति, परम्परा, रितिरिवाज पाखें दुजः सागर माली, कार्यक्रम व अर्थ संकलनपाखे दुजः नवीन रञ्जितकार, संचार व सदस्य संकलनय् धु्रव श्रेष्ठ, सूचना प्रविधिइ सरद चित्रकार व अडिटय् संज्ञाम जोशी व स्वपनिल कायस्थ च्वनादीगु दु ।

थ्व कार्यसमितिया दुजःपिनि पदावधि सन् २०१९ निसें २०२१ तक जुइ । समाजय् खुइम्हं मल्याक आजीवन व साधारण दुजःपिं दु । वय्कःपिंसं दँय्दसं थुकथं हे थीथी ज्याझ्वः सहित क्यानाडाय् नेवाःतय् म्हसीका न्ह्यब्वयादी ।