
येँ(नेपालभाषा टाइम्स)- केन्द्रीय मानन्धर संघया ग्वसालय् शनिवाः थनया वसन्तपुलिइ च्वंगु दशअवतार देगलय् छगू तःजिगु धाःबाजं ब्वज्या जुल । धाःबाजं ब्वज्याय् स्वनिगःया थीथी जिल्लालिसें स्वनिगः लिक्क लाःगु काभ्रेया भ्वँतं नं ब्वति काःगु खः ।
धाःबाजं ब्वज्याय् लाय्कूसाः मानन्धर समाज, चस्वांद्वँ मानन्धर सनाःगू खलः, थँहिटी मानन्धर गुथि, दैसाः टोल मानन्धर समाज, मानन्धर सनाःगू खलः न्हूसाः, पाक्व पुखूद्यां सनाः खलः, न्यागःमणि फेदी मानन्धर संघ, भिंद्यः गुथि कालिमाति, श्रीपञ्चमी मानन्धर गुथि (किपू), मच्छेगां मानन्धर गुथि, फय्ख्वाः मानन्धर गुथि रामकोट व जापाली (वाँख्यो दाफा भजन खलः) पाखें थःथःगु बाजं प्रस्तुति न्ह्यब्वःगु खःसा थँहिति त्वालं मुक्कं मिसातय्त प्रतिनिधत्व याकाः धाःबाजंया प्रस्तुति बिउगु खः दकलय् लिपा नेवा अर्केष्ट्रा नं न्ह्यब्वःगु खः ।
सांस्कृतिक सम्पदायात न्हू पुस्तायात हस्तान्तरण यायेगुलिसें अमूर्त सम्पदा संरक्षण प्रवद्र्धन यायेगु उद्देश्यं ग्वसाः ग्वःगु धाःबाजं ब्वज्याय् प्रत्येक त्वाःगुथिपाखें अप्वःथें १२ दँनिसें ४० दँतकया ल्याय्म्ह ल्यासेतय्त सहभागि याकूगु खः ।
ज्याझ्वलय् नवासें बागमति प्रदेशया सांसदलिसें लिसें पुलांम्ह मन्त्री वसन्त मानन्धरं न्हापांखुसी बाजं ब्वज्या जूगु इलय् च्यागू त्वालं जक ब्वति काःगु खःसा निक्वःगु बाजं ब्वज्याय् झिंनिगू थ्यंगुलिं लसता प्वंकादिसें आकिवं थ्व स्वयां अप्वः बाजं खलः दुथ्याइगु नापं स्वनिगः पिनेयापिंत सहभागि याकेमाःगु खँय् बः बियादिल । लिसें वय्कलं मूर्त सम्पदाया निंतिं विश्वय् नांजाःगु वसन्तपू लाय्कुलिइ अमूर्त सम्पदायात पुस्तान्तरण यायेगु ज्यां वइगु दिनय् थुकिया संरक्षणया निंतिं तःधंगु तिबः जूवनीगु विश्वास प्वंकादिल ।
येँ महानगरपालिकाया प्रवक्तालिसें १७ वडाअध्यक्ष नविन मानन्धरं देय्या हे छगू तिसा रुपय् दयाच्वंगु अमूर्त सम्पदाया संरक्षण व प्रवद्र्धनलिसें विकासया निंतिं स्थानीय सरकारं ज्या याना वयाच्वंगु दु धयादिल । लिसें वय्कलं संस्कृतियात आय आर्जन यायेगु माध्यम दयेकाः यंके फत धाःसा थज्याःगु गतिविधिया औचित्य नं दइ धयादिल ।
संघया सभापति मनोजकुमार मानन्धरया सभापतित्वय् जूगु ज्याझ्वलय् बाजं ब्वज्याय् ब्वति कयादीगु त्वाः गुथि खलःयात प्रदेश सांसद वसन्त मानन्धर, महानगरया प्रवक्ता नविन मानन्धर, १३ वडाअध्यक्ष ध्रुवनारायण मानन्धरं दसिपौ लःल्हानादीगु खः । ज्याझ्वलय् संघीय सांसद सपना राजभण्डारी जोशी, बागमति प्रदेश सांसद शैलेन्द्रमान वज्राचार्य, २० वडाअध्यक्ष राजेन्द्र मानन्धर, श्रीशार्दूल जंग गुल्मया गुल्मपति सेनानी पूर्ण प्रजापति येँ महानगर सम्पदा विभागया श्रृजु प्रधानया नं उपस्थिति दुगु खः ।
संघया संचार उपसमितिया संयोजन व मानन्धर ल्याय्म्ह पुचःया सह संयोजनय् उगु ज्याझ्वः जूगु खः ।
LEAVE YOUR COMMENTS