सिसडोलवासीयात एम्बुलेन्स

येँ – येँ महानगरपालिकां स्वनिगःया फोहर व्यवस्थापन याना वयाच्वंगु ककनीया सिसडोलवासीयात एम्बुलेन्स उपलब्ध याकूगु दु । येँ मनपां नुवाकोट जिल्लाया ककनी गाउँपालिका अन्तर्गतया सिसडोल क्षेत्रया प्रभावित वासिन्दातय् निंतिं एम्बुलेन्स उपलब्ध याकूगु खः । येँ महानगरपालिकाया प्रमुख विद्यासुन्दर शाक्यं थम्हं दछि न्ह्याः यानादीगु प्रतिवद्धता पूवंके कथं एम्बुलेन्सया ताःचा ककनी गाउँपालिकाया प्रमुख मानबहादर लामायात लःल्हानादीगु खः ।

येँ मनपां वंगु झिंस्वदँ न्ह्यवंनिसें फोहर व्यवस्थापन याना वयाच्वंगु सिसडोलय् फोहर यंकेबलय् व अन वानातःगु फोहरं प्रत्यक्ष रुपं प्रभावित स्थानीयवासीयात ग्वाहालि यायेकथं उगु एम्बुलेन्स उपलब्ध याकूगु खः । उगु इलय् येँ मनपाया उपप्रमुख हरिप्रभा खड्गी श्रेष्ठं स्वनिगःया फोहर व्यवस्थापन याना वयाच्वंगु सिसडोलवासीया निंतिं एम्बुलेन्स उपलब्ध याकेगु जक मखसे तत्काल समस्याया समाधान मालेमाःगु खँय् बः बियादिल ।

येँ व यल महानगरपालिकां दछि न्ह्यः प्रभावित क्षेत्रया वासिन्दातय् निंतिं छगः छगः एम्बुलेन्स उपलब्ध याकेगु सम्झौता याःकथं येँ मनपां एम्बुलेन्स उपलब्ध याकूसां यल महानगरपालिकापाखें प्रक्रिया धाःसा जारी जुयाच्वंगु यल महानगरपालिकां न्ह्यथंगु दु । थौं स्वयां झिंस्वदँ न्ह्यः निदँया निंतिं फोहर व्यवस्थापन यायेगु ल्याखं उगु थाय् काःगु खःसां आतकं विकल्प ल्यये मफुगुलिं सिसडोलवासीत अनेकथंया ल्वचं शिकार जुइमाःगु अवस्था वयाच्वंगु दु ।